Damian Kratzenberg

Vu Wikipedia, der fräier Enzyklopedie.

Den Damian Kratzenberg, gebuer de 5. November 1878 zu Klierf gouf den 11. Oktober 1946 an der Stad higeriicht.

Nodeems de Kratzenberg seng Lycéesstudien zu Dikrech gemaach hat, huet hien zu Lille, Paräis a Berlin Philologie studéiert. Duerno gouf hien agestallt als Professer fir Griichesch an Däitsch, fir d’éischt zu Dikrech, dann zu Iechternach an an der Stad.

1907 gouf hie Member am Volksbildungsverein, engem éischter lénksgeriichten antiklerikalen Veräin, vun dem hie vun 1922 bis 1934 President war. Vun 1912 bis 1934 war e Member vun der Association Générale des Étudiants Luxembourgeois. Politesch engagéiert war hien tëschent 1930 an 1938 an der Liberaler Partei.

[Änneren] Heim ins Reich

Seng däitlech Léift fir déi däitsch Kultur a besonnesch fir déi däitsch Literatur huet de Kratzenberg op ganz Däitschland iwwerdroen. Fir hien waren d'Lëtzebuerger Däitschstämmeger. Hien huet seng Däitschstämmegkeet bei all Geleegenheet erfirgehuewen, awer an deem Moment huet en nach op déi statlech Souveränitéit gehalen.

Wéi sech vum Januar 1933 un eng Diktatur am Nopeschland breedgemaach hat, huet en et um Ufank fir eppes gehal, mat deem déi däitsch Kultur scho géif fäerdeg ginn.

Mee am Laf vun der Zäit huet de Kratzenberg sech ëmmer méi zum Nationalsozialismus gedréint. Hien huet ugefangen, sech zu dem nationalsozialisteschen Führerprinzip ze bekennen. Dat huet mat sech bruecht dass hien et fir néideg fonnt huet, dass déi biergerlech Fräiheeten missten ofgebaut ginn, fir d'Ziler vum Nationalsozialismus z'erreechen. Den Héichpunkt an deeër Entwécklung koum 1936. Do krut de Kratzenberg déi renomméiert Goethemedaille für Kunst und Literatur wéinst sengen aussergewéinleche Verdéngschten fir déi däitsch Kultur. Iwwer de Lëtzebuerger Ambassadeur huet en dem Adolf Hitler ausriichte gelooss, hien, den Hitler, wier deen edelste Mensch an dee stärkster Hort für die Zukunft Europas.

[Änneren] GEDELIT

1934 gouf d'Luxemburger Gesellschaft für deutsche Literatur und Kunst (GEDELIT) als Géigestéck vun der Alliance Française gegrënnt. De Kratzenberg huet déi Vereenegung vun 1935 u geleed. 1938 huet d'GEDELIT ugefaangen, Propaganda an de lëtzebuerger Lycéen ze maachen. D'Sturmtrupp Lützelburg, eng Grupp vun nazifréndleche Schüler, huet hir Versammlungen am Lokal vun der GEDELIT ofgehalen. Dem Kratzenberg seng Zeitung Luxemburger Schau war ganz kloer nazistesch.

Am Mee 1938 koum et zu engem Prozess géint ee vu senger Schüler, deen um Nationalfeierdag eng Freedefeiers-Rakéit explodéire gedoen hat. Am Prozess koum dunn eraus, dass de Kratzenberg seng Schüler all Samschdeg em sech hat fir se z'endoktrinéieren. Hien ass doropshin vu Journalisten beschëllegt ginn, seng Plaz als Professer ze mëssbrauchen. Hien huet dann e Prozess géint de Journalist Émile Marx gewonnen. Säi gudde Numm als Pädagog hat doerdurch awer gelidden.

Am Mee 1939 huet en e Virdrag zu Köln gehalen , an deem hien iwwer Zougehéiregkeet vun de Lëtzebuerger zu der germanischen Rasse geschwat huet, an an dem en déi historesch an sproochlech Zougehéiregkeet zu Däitschland beweise wollt. Nëmmen e puer Wochen no der Annektioun vum Rescht vun der Tschechei als däitschgefouert Protektorat Böhmen und Mähren hunn e sou Wierder natierlech groussen Androck gemaach a si verstane ginn als Averständnis fir der GEDELIT hir Heim ins Reich Virstellungen. Doropshinn huet den Erzéiungminister Margue dem Kratzenberg matgedeelt, wann hien dat nach eng Kéier giff maachen, da géif en seng Statsplaz verléieren.

[Änneren] Zäit vun der däitscher Okkupatioun

Wéi däitsch Truppen den 10. Mee 1940 Lëtzebuerg besat haten, war d'GEDELIT komplett eng politesch Organisatioun am Déngscht vum Okkupant. De 17. Mee 1940 gouf d'Volksdeutsche Bewegung, (VDB) gegrënnt, déi ënner dem Kratzenberg dann däitlech fir en Anschluss un Nazidäitschland agetrueden ass. A senger neier Fonktioun war de Kratzenberg dem däitschen Chef der Zivilverwaltung, dem Gauleiter Gustav Simon ennerstallt.

De 6. Juli 1940 huet d'VdB en Opruf gemaach:

Luxemburger, höre die Stimme des Blutes! Sie sagt dir, dass du nach Rasse und Sprache ein Deutscher bist. Luxemburgertum in allen Ehren! Denn wahres Luxemburgertum ist reines Deutschtum.

[Änneren] D'Enn

Wéi 1944 d'Alliéiert op Däitschland zougeréckelt sinn, huet de Kratzenberg sech den 1. September duerch d'Bascht gemaach. Op Tréier, dann iwwer Koblenz op Weißenberg. E Bréif u säi Meedchen huet en no Krichsenn verroden. Hie gouf op Lëtzebuerg bruecht, wou him de Prozess gemaacht gouf wéinst sengen Aktivitéiten. Dee Prozess huet véier Deeg gedauert. Den 1. August 1946 gouf hien zum Doud veruerteelt.

Den Damian Kratzenberg gouf den 11. Oktober 1946 um Schéisstand vun der Kasär um Helleg-Geescht-Plateau erschoss.
Hie gëtt hautesdaags als den Haaptmann vun der Lëtzebuerger Nazi-Kollaboratioun betruecht, also als lëtzebuergeschen Degrelle oder Quisling.