Luxemburger Wörterbuch
Vu Wikipedia, der fräier Enzyklopedie.
D'Luxemburger Wörterbuch ass en Dictionnaire vun der Lëtzebuerger Sprooch, deen tëschent 1950 an 1975 an 23 Fasciculen (mat engem Ergänzungsband 1977) erauskomm ass.
Et ass dëst, nom Lexicon der Luxemburger Umgangssprache vun 1847 an dem Wörterbuch der Luxemburger Mundart vun 1906, deen drëtte a bis ewell gréisste lëtzebuergeschen Dictionnaire.
Seng Ufänk leien am Joer 1935, wou vu staatlecher Säit eng sougenannt Dictionnaires-Commissioun agesat gi war, déi bannent der linguistescher Sektioun vum Institut Grand-Ducal geschafft huet. 1939 war d'Dictionnaires-Commissioun souwäit domatter fäerdech, d'Wierder ze "sammelen". Mee wéinst dem Ufank vum Zweete Weltkrich huet et bis 1948 gedauert, bis d'Aarbechte konnte virugoen. An deem Joer ass eng nei Dictionnaires-Commissioun vun der Regierung Dupong-Schaus an d'Liewe geruff ginn. Si bestung bei hirer Grënnung aus dem Joseph Tockert (President), Robert Bruch (Sekretär), Joseph Hess, Ernest Ludovicy, Joseph Meyers, Hélène Palgen an Isi Comes.
Am Februar 1950 ass dann déi éischt Liwwerung, vun A bis Aaschtert, erauskomm. Fir de Saz an den Drock war d'Dréckerei Linden zustänneg.
1978 huet d'Dréckerei Beffort eng nei Oplo vum Luxemburger Wörterbuch gemaach, déi a Form vu fënnef Bänn erauskoum. Inhaltlech gouf näischt dru geännert, just e puer Wierder, bei deenen et zu enger feelerbedengter Sënnännerung komm war, goufe verbessert.
Inhaltsverzeechnis |
[Änneren] Déi eenzel Liwwerungen
- Band I
- I.: Einleitung, A - Aaschtert (Februar 1950)
- II.: Aascht - Bereimerei (Oktober 1950)
- III.: berieden - Buz (Mee 1951)
- IV.: C - eer (Juni 1952)
- V.: eer - verdroen (Mee 1953)
- VI.: Verdross - Phylloxera (Mee 1954)
- Band II
- VII.: Ga - Grippert (Mee 1955)
- VIII: Grippe-sou - Himmel (Mee 1956)
- IX: Himmel - Joër (Juli 1957)
- X: Joër - Käser (August 1958)
- XI: Käserkroun - Klun(t)schelmrei (September 1959)
- XII: Klun(t)schert - Cuvette (September 1962)
- Band III
- XIII: L - mag (Januar 1965)
- XIV: Mag(a)rin - mockeleg (Januar 1967)
- XV: Mockendrischel - O (Januar 1968)
- XVI: O - Passajhéier (Februar 1969)
- XVII: Passajhéierschëff - puzeg (Februar 1970)
- Band IV
- XVIII: R - Sak (Februar 1971)
- XIX: Sak-auer - Schmot (Februar 1972)
- XX: Schmotz - spéngelen (Februar 1973)
- XXI: Spéngelskapp - Tälli (Oktober 1973)
- XXII: täls - Waasserhiresch (Abrëll 1974)
- XXIII: Waasserholz Zypress (Abrëll 1975)
- Band V
- Ergänzungsband (Dezember 1977)
[Änneren] Wat ass d' Luxemburger Wörterbuch (a wat ass et net)?
D'Luxemburger Wörterbuch ass, wéi säin Numm et noleet, eng Sammlung vu Lëtzebuergesche Wierder an Ausdréck. D'Lemmata, déi - meeschtens - alphabetesch organiséiert sinn, ginn op däitsch genee explizéiert, heiansdo steet och déi franséisch oder, aus Schimmt, latengesch Entspriechung derbäi. Et fällt op, dass d'Wierder zum Deel net der Logik vun der alphabetescher Reienfolleg, mee der phonetscher no getässelt sinn (sou stinn z.B. Wierder, déi mat "V" oder "Ph" ufänken, all ënnert dem Buchstaf "F"; Wierder mat "C" stinn, je nodeems, ënner "K" oder "S", asw.). De Grond heifir war, dass 3 Joer virun der Publikatioun vun der éischter Liwwerung d'Orthographie vum Lëtzebuergeschen duerch en Arrêté ministériel eng éischte Kéier "offiziell" festgeluecht gi war. D'Offiziell Lëtzebuerger Orthographie, wéi se genannt gouf, war konsequent phonetesch, mee et gouf séier kloer, dass se kaum Akzeptanz bei de Leit fonnt hat. Dofir gouf vun der Dictionnaires-Commissioun, ënnert dem Impuls vum Robert Bruch, eng nei Orthographie ausgeschafft, déi spéider Dictionnaires-Orthographie genannt sollt ginn. D'Dictionnairesmécher schénge sech hirer Saach awer net honnertprozenteg sécher gewiescht ze sinn, dofir déi ernimmte Konzessioun un de phonetesche Prinzip.
Inhaltlech ass d'Luxemburger Wörterbuch en Thesaurus linguae, d.h. eng Sammlung vun Allem wat et am Lëtzebuergesche gëtt oder zum Deel fréier gouf. Mat groussem Detail sinn och regional a lokal Variante repertoriéiert. Drann ze fannen sinn och Riedensaarten a Spréchelcher, Nimm an Uertschaftsnimm. Bewosst op der Säit gelooss gouf, wat vun der Redaktioun als Neologismen ugesi gouf, deemno Wierder, déi onverännert aus dem Däitschen oder Franséischen iwwerholl sinn.
Doduerch léisst sech och beschreiwen, wat d'Luxemburger Wörterbuch net ass (oder sollt sinn): engersäits ass et kee preskriptiven Dictionnaire, dee giff virschreiwen, wat wéi misst sinn (wat och net verwonnert: Et gëtt keng institutionaliséiert Norméierung, keng Akademie, déi giff definéieren, wéi wat genannt misst ginn), anerersäits och net e sougenannten Hand-Dictionnaire, wou ee just kéint nosichen, wéi wat geschriwwe géif, an deen den Alldaags-Vocabulaire ofdeckt.
[Änneren] En "antisemiteschen, antiklerikalen, auslännerfeindlechen an obszönen" Dictionnaire?
De 7. November 1996 huet de Paul Cerf am Tageblatt en Artikel publizéiert mam Titel "La Section linguistique de l'Institut grand-ducal patronne un ouvrage antisémite, anticlérical, xénophobe et obscène".
An dësem Artikel retracéiert en d'Entstéiungsgeschicht vum Dictionnaire, beschreift, wéi eng nei Dictionnairescommissioun, déi 1992 aberuff gouf, geschwënn nees auserneegebrach ass, an domatter verbonnen de Fait, dass d'Luxemburger Wörterbuch alt nees eng Kéier 1995 onverännert nogedréckt gi war (well et vergraff war). Hie beschreift, dass ënnert dem Lemma Judd eng drësseg Spréchelcher an Ausdréck opgezielt sinn, déi all negativ, pejorativ a beleidegend sinn. De jiddesche Consistoire hat sech schonns 1986 beim deemolege Kulturminister Robert Krieps doriwwer beschwéiert, an e krut vum Staatssekretär Guy Linster verséchert, dass, wann den Dictonnaire nei opgeluecht géif (réédition), d'Notizen am Ufank vum Lemma ënnerstach an ergänzt géifen (Dës Notiz seet: "Spww. und Raa. erinnern noch an die aus mittelalterlicher Intoleranz geborenen Verschrienheit des Juden, werden allerdings heute weitgehend nur noch formelhaft in ihrer pej. Bed. gebr., ohne daß sich der Sprecher einer konfessionellen oder gar rassistischen Diskriminierungbewußt wäre"). Well am Cerf sengen Aen dëst Verspriechen net ageléist gi war - D' Luxemburger Wörterbuch war, wéi gesot 1993 nogedréckt ginn, an e weidere Protest bei der Delegéierter Kulturminsitesch Marie-Josée Jacobs näischt bewierkt huet, huet en dann deen Artikel geschriwwen. Deen hält op mat enger Rei rhetoresche Froen, wou en der Linguistescher Sektioun vum Institut Grand-Ducal (IGD-LEO) pekuniär Interessen ënnerstellt an hir Comptabilitéit a Fro stellt.
6 Deeg drop huet de Lex Roth (deen kee Member vum IGD-LEO ass) mat engem Artikel am Lëtzebuerger Journal "geäntwert", an deem e probéiert huet, d'Éier vun den Dictionnairesmécher ze retabléieren, mee wéinst senger gewinnt faarweger Sprooch an enger Rëtsch perséinlechen Attacke géint den Cerf, der Saach éischter e schlechten Déngscht geleescht huet.
An engem Bréif vum 18. Dezember 1996 un de President an de Sekretär vum IGD-LEO huet d'Kulturministesch Erna Hennicot-Schoepges dës an engem secën Toun "somméiert, déi Exemplairë vum Dictionnaire, déi nach net verkaaft sinn, direkt aus dem Verkéier ze zéien", well d'Droits d'Auteure beim Staat léichen.
Domat krut den Eclat ëm d'Luxemburger Wörterbuch eng nei Dimensioun: Nierft der editorescher an inhaltlecher Dimensioun koum elo nach eng politesch a juristech derbäi: Politesch, well et äusserst sielen ass, dass de Staat eng Publikatioun, déi en och nach mat gedroen huet, zensuréiert, a well sech doduercher d'Fro stellt, ob een Tatsaachen, déi engem net passen - de joerhonnertelaange latenten Antisemitismus an Deeler vun der Bevëlkerung - duerch Zensur einfach esou aus der Welt schafe kann; juristesch, well déi Fro nom Copyright, dat beim Kulturminisère léich, sou kloer net ass.
Inhaltlech huet sech och de Guy Rewenig e puer mol mam Luxemburger Wörterbuch ausernee gesat: Hie kritiséiert, dass den Dictionnaire e reaktionärt Fraebild giff vehikuléieren (et ginn Dosende vun Ausdréck, déi d'Fraen als topesch, elle, lidderech, asw. beschreiwen) a sech zevill am Sammele vu méiglechst "exoteschen" Ausdréck oder Prononciatioune verléieren, awer keng neutral Beschreiwung vun der moderner Alldaagssprooch liwwere géif.
Déi ganz Diskussioun huet schlussendlech alle Betraffene kloer gemaach, dass en zäitgeméissen Dictionnaire vun deem, wat haut zu Lëtzebuerg geschwat gëtt, iwwerfälleg war. De Conseil permanent de la langue luxembourgeoise, deen 1998 an d'Liewe geruff gouf, gouf dann och 1999 domatter chargéiert, een neien Dictionnaire auszeschaffen.
[Änneren] Literatur
- Luxemburger Wörterbuch. 4 Bänn an 1 Ergänzungsband. Lëtzebuerg: Linden, 1950-1975/1977.
