Styx (Mythologie)

Vu Wikipedia, der fräier Enzyklopedie.

Dësen Artikel beschäftegt sech mam Styx aus der griichescher Mythologie. Fir aner Bedeitunge, kuckt w.e.g. Styx.

De Styx (gr. Στyξ, Floss vum Haass, am Griichesche weiblech wéi nëmme ganz wéineg Flëss) ass e Floss an Arkadien dee vun den Häng vum Chelmos iwwer Fielsen zu Dall gestierzt an an d'Ënnerwelt gestréimt ass. Niewt Acheron, Lethe, Kokytos, Phlegethon an Eridanus ass et an der griichescher Mythologie e Floss vun der Ënnerwelt an eng Flossgëttin.

Dem Hesiod no war si d'Duechter vum Okeanos an Tethys. Si huet sech mam Pallas bestued an hat mat him d'Kanner Zelos ("Äifer"), Nike ("Victoire"), Kratos ("Muecht") a Bia ("Gewalt"). Si gëtt och heiansdo als Mamm vun der Skylla a vun de Quellen a Séien bezeechent. Een aneren, deen als hiere Mann ernimmt gëtt, ass de Piras, mat deem si d'Hydra soll kritt hunn.

De Styx stellt d'Grenz duer tëscht der Welt vun de Liewegen an dem Hades sengem Douderäich. De Floss ëmfléisst de Hades néng Mol. D'Séile vun deenen Doudegen gi vum Charon eriwwer geschëfft. Aus deem Grond hunn si och eng Mënz (Obolus) matkritt mat däer se de Fährmann konnte bezuelen.

Anere Quelle no duerchfléisst de Styx den Hades andeems en sech siwe Mol wënnt ier en als Floss Alpha nei entspréngt. D'Verknäppe vum Doudesfloss mam éischte Buschtaw vum griicheschen Alphabet symboliséiert an deem Fall den éiwege Kreeslaf vu Gebuert, Doud a Reinkarnatioun. Erëm eng aner Versioun erzielt datt de Styx an den Acheron fléisst.

D'Waasser vum Styx mécht jiddfereen, deen an em buedt, onverwondbar. Aus deem Grond ass och den Achilleus vu senger Mamm Thetis an de Styx gezappt ginn. Just un senger Feescht, un däer seng Mamm en ugehalen hat, konnt e nach verwondt ginn. D'Waasser soll och héich gëfteg gewiescht sinn, sou soll z.B. den Alexander de Groussen domat vergëft gi sinn.

D'Gëtter hunn hier Eeden beim Styx geschwuer, sou wéi den Zeus et versprach hat, dofir datt si de Gëtter bei der Titanomachie gehollef huet. D'Iris ass da geschéckt gi fir mat engem gëllene Krou Waasser aus dem Styx ze huelen. Wien säin Eed muttwëlleg gebrach huet, huet sech missen 10 Joër laang vun deenen anere Gëtter ewech halen. Dat éischt Joër huet e missen ouni Otem, Ambrosia a Nektar auskommen an déi nächst 9 Joër ass e weiderhinn vun der Gesellschaft vun de Gëtter ausgeschloss gewiescht. Dat war och ee vun de Grënn firwat datt d'Styx vun de Gëtter gehaasst gouf.