Vëlodrom Belair
Vu Wikipedia, der fräier Enzyklopedie.
De Vëlodrom Belair war enger Privatinitiativ, der Société du Parc des Sports ze verdanken. Sekretär war 1921 de Pierre Kellner.
D'Aweiung war den 28. August 1921 a Presenz vum Prënz Felix an den Ambassadeure vu Frankräich a vun Italien. De Vëlodrom war eng Pist aus Bëtong mat enger Längt vun 333,3 Meter. Gedeckten Tribünen a Sanitäranlage waren och installéiert ginn. De Velodrom mat sengem Terrain an der Mëtt war zu där Zäit anengems den eenzegen Sportstadion an der Stad. E gouf benotzt fir alerlee Manifestatiounen am sportlechen a kulturellen Beräich ofzehalen. De Racing Club Luxembourg (virun der Fusioun mam Sporting) huet do eng zäitlaang Fussballmatcher gespillt, mä, bedéngt duerch d'Bëtonspiste, hat den Terrain net déi reglementair Dimensiounen.
Wëll hir Ausgaben bei waïtem méi grouuss waren wéi hir Recetten, gouf 1925 d' Société du Parc des Sports liquidéiert. Eng Vereenegung mam Numm Le Comité d'Initiative François Faber hat de 17. September 1925 Leit aus dem Sportsmilieu an de Café Mille Colonnes (an der Dicks-Strooss am Garer Quartier vun der Stad Lëtzebuerg?) an eng Versammlung ageruff fir ze verhënnernen dat de Vëlodrom an d'Hänn vun enger auslännescher Immobiliefirma géif geroden. De Comité National Olympique huet en Opruff gemaach fir den 24. September 1925 massiv an eng Versammlung am Hôtel de l'Ancre d'Or ze kommen, an déi d'Regierung, d'Députéierten, d'Coneilleren vun der Gemeng Lëtzebuerg a Vertrieder vun de Sportsverbänn a -veräiner invitéiert goufen. An där Versammlung sollt et iwwer e méiglechen Opkaf vum Vëlodrom vun der Gemeng oder dem Staat riets goen.
All Beméiungen waren awer ëmsoss, an eng belsch Immobiliefirma huet den 3,5 ha grousse Komplex opkaaft. Kuerz drop gouf de Vëlodrom zougemaach, nodeems nach 1926 an 1927 d'Fête Olympique do organiséiert gouf.
Déi däitsch Zivilverwaltung huet de Vëlodrom 1941 nees an d'Rei gesat, an et koum 1942 zu enger zweeter Aweiung. Am Zweete Weltkrich konnten Nimm wéi Lull Gillen, Chris Didier an d' Bridder Warnier bei Courssë bis iwwer 10.000 Spectateuren ulackelen.
No der Befreiung war de Vëlodrom e Sammellager fir däitsch Gefaangener. Um Ufank vum Joer 1949 konnt d'Pist nees fir Courssë benotzt ginn. Dat war déi grouss Zäit vu lëtzebuergesche Coureure wéi de Kurt Warnier, Jang Ferrari an de Piste-Spezialist Lull Gillen.
De 27. Juni 1947 koum déi 3. Etapp vum Tour de France vu Bréissel op Lëtzebuerg iwwer 314 km am belairer Vëlodrom un. Si gouf gewonnen vum Italiener Aldo Ronconi. Déi dräi Lëtzebuerger déi nach an der Course waren; Jeng Kirchen, Bim Diederich a Jean Goldschmit aus der Equipe Lëtzebuerg-Schwäiz, koumen op d'Plazen 14, 15 a 17.
De Vëlodrom koum 1952 ënner d'Schëlter vun de Bulldozer.
An der Schäfferotserklärung huet d'Sportschäffen Anne Brasseur am Februar 2006 e Vëlodrom zu Zéisseng ugekënnegt. Als fréier Sportministerin hat si schonns fir e Kredit am staatleche Fënnefjoresplang (2003-2008) gesuergt. Den neie gedeckte Vëlodrom soll nieft de Sportszenter Boy Konen zu Zéisseng opgeriicht ginn. Schliisslech ass de lëtzebuergesche Vëlosport déi eenzeg olympesch Disziplin, déi nach ëmmer keng Infrastruktur huet.
