Baek (plaats)

Van Wikipedia

Dit artikel is gesjreve in 't Baeks. 't Weurt gewaardeerd óm in dit artikel 't Baeks aan te hauwe of aan te gaeve welk anger dialek gebroek is.

Sint Maartenskèrk

Baek (Nederlands: Beek) is 'n plaats in de gelieknamige gemeinte Baek in Zuud Limburg. Ouw name zint: Baek euver de Maas, Beck, Beeck, Beeken, Becca. In de tied van de Franse bezètting waor de naam Beeck in den landen van Valckenborg gebrukelik ter óndersjeijing van Baek bie Bree in (noe) Belsj en Beeck bie Randerade in (noe) Duutsjland. De naam Baek geit truk nao de Keutelbaek, die vanoet de Kelmonderbösj via de plaats in de Gelaenbaek oetmóndt. In 't dörp Baek wone in 2002 ongevaer 9000 luuj, verdeild in Baek-oas: 6300 en in Baek-wes: 2650.

[bewirk] Gesjiedenis

Op 't land grenzend aan de baek, die gevörmp weurt oet de brónne in de Kelmonderberg höbbe al saer langen tied luuj gewoond. Ónder aan de beek óntwikkelt zich Nirbik en in 't dal (sjpauw) óntsjteit Sjpawbik. In de Middelièwe zint machtige Hière, wie de proos van Meersje en daonao de Hière van Valkeberg hie de baas. In 1381 kump 't Land van Valkeberg ónder de hertog van Brabant. Baek weurt dan hoofbank (regionale rechbank) van de umgevende dörper en gehuchte: Nirbik, Geverik, Kelment, Oansel, Sjpawbik, Wiegelrade, Hobbelrade, Gelaen en Sjènne. In de later Middelièwe werpe de inweunersj landgrave op bie de hoofwaeg, ter verdeidiging tege soldaote en doortrèkkende vraeme. In 1661 weurt tösje de keuning van Sjpanje en de Sjtate Generaal van de Nederlande 't Partage-Tractaat geteikend, dat inhèlt dat midde door Baek de landsgrens kump te ligke. De katholieke godsdeens maog neet in 't Sjtaats gebeed oetgeoefend weure, mèt 't gevolg dat in Hobbelrade (buurtsjap van Sjpawbik) 'n sjuurkèrk weurt ingerich. In 1683 maoge preestersj wir nao hun kèrk truk, meh same mèt de protestante in ein geboew, (Simultaan kèrk). In 1837 zölle de protestante ein eige kèrkgeboew kriege. In 1800 weure Baek en Sjpawbik zelfsjtendige gemeintes. In 1982 weurt de nuuj gemeinte Baek gevörmp.

[bewirk] Bezeenswaerdighede

Sint Maartens-(Martinus)kèrk is 'n neo-romaans geboew ter vervanging van 'n gotische pseudo-basiliek mèt westore. De boew begós volges de planne van L. von Fisenne in 1888. Nao 'n ónderbreking, geit me wiejer in 1893 ónder leiding van Jos Cuypers en Jan Stuyt. In 1910 weurt ze ingewiejd. In 't interieur valle de gebrandsjilderde vènstere en moersjilderinge op. Daoneve 'n hoofaltaor, zie-altaore en twiè beechsjteul oet 't begin van de 19e ièw. 't Doupvont sjtamp oet 1632 en 'n paar houte beelde oet de periode 1500-1800.
In de Kapel van de Carmel van de keuningin weurt saer 1938, edere 25e van eder maond, 't Kinneke Jezus van Praag verièrd. Väöl pelgrims vónge hunne waeg nao dees kapel.
't Oorlogsmonument, naeve de Maartenskèrk, dateert van 1969 en is óntworpe door de Baekse beeldhouwer Arthur Sproncken.
De veurmalige hervormde pastorie is 'n baksjteine geboew mèt sjpeklaoge oet 1723.
De Parochiekèrk van Slevevrouw van de miraculeuze medaille, is geboewd in 1962 en óntworpe door architect H. Koene oet Mestreech.
De Meulebergkapel haet ouch es petroanheilige Slevevrouw van de miraculeuze medaille.
De Nederlands Hervormde-kèrk dateert van 1837. Bezeenswaerdig is 'n kèrkörgel oet 1776, geboewd door de breursj De Rijckere, oarsjprónkelik veur de NH-kerk in Axel.
Op de plek van 'n veurmalige synagoge aan de Meulesjtraot sjtoon 2 oorlogsmonumente, die herinnere aan de Juudse sjlachoffersj oet 't dörp. 't Herdinkingsmonument oet 1987 is óntworpe door Francisca Zijlstra.
't Gemeintehoes sjtamp oet 1887. Bie 't hónderdjaorig besjtaon in 1987 is veur 't geboew 'n reliëfzuul geplaats nao 'n óntwerp van Arthur Sproncken. De reliëfs goon truk nao de Baekse gesjiedenis, Historica Bechae continet facta et fabulas.
Openbaar beelde in Baek: Aan de Hoolsjtraot 'n Mariabeeld oet 1946 van beeldhouwer Charles Vos; aan de Sjtege 'n Siguinermonument van Math van Kampen oet 1993; bie 't gemeintehoes de fontein mèt bróns: De Veer windriechtinge van Arthur Sproncken oet 1985; bie 't politiebureau 'n bronze sculptuur de Wachtersj van Twan Lendfers oet 1990; van beeldhouwer Gène Eggen oet Ulesjtraote 'n helsjteine sculptuur Esther oet 1995; aan de Mestreechterlaan 'n brónze sculptuur Baeker pottentaot van Jo Ramakers oet 1988.

De bienaam veur de Baeker inweuner is pottentaot.

't Aels-(Els) museum dank zien besjtaon aan 'n bedrief, dat vanaaf 1860 in Baek 'ne zjenever mèt de naam Aels woort gesjtook. 't Oarsjprónkelik bedrief, NV Jacques Hennekens, is door de Heineken Broewerie euvergenómme. De echte Aels-la-Vera weurt allewiel door Bols gemaak. 't Museum umvat 'n preuflokaal Sint Augustien, 't Aelsmuseum, 'n óntvangsruumde en 'n expositieruumde van de heemkundevereiniging.

[bewirk] Evenemente

Carnaval mèt optoch
Paosjvièmert
Zomerkèrmes in 't 2e weekend nao Pinkstere. Sóndigs vingk de Brónk plaats.

[bewirk] Dörpsvereiniginge

Sjötterie Sint Martinus
Heemkunde Baek

[bewirk] Bekènde inweunersj

H.J. Beckers, ,1862-1950, arts/archeoloog
Gabriël Beckers, 1908-1970, arts/acteur
Peter Trecpoel, preester en kronieksjriever
Arthur Sproncken, (geb. 1930), beeldhouwer
Jeff Scheffers, (geb. 1906), kunsjilder

Gemeinte Baek
Dörper: Baek \| Groat Genhout \| Geverik \| Klein Genhout \| Nirbik \| Sjpawbik
Buurtsjappe en gehuchte: De Aw Kèrk \| Hoebelrao \| Hoeve \| Kelment \| Looiwinkel \| Sint-Jansgelaen