Frankisch
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
't Frankisch waor 't dialek vaan 't Germaans volk de Franke. 't Behuurde tot de Wesgermaanse taole.
De Franke hadde ziech in 't Roemeins Riek gevesteg es foederati, boondgenäöj, vaan de Roemeine, en wel in noord-Gallië. Bij de val vaan 't Roemeins Riek en de Groete Volksverhuzing verplaotsde de Franke ziech nao 't noorde en ooste touw, en bouwde 'n ummer groeter riek op. Oonder keizer Sjarel de Groete besloog dit riek gans Frankriek (wat ziene naom vaan dit volk heet), Duitsland, de Nederlen, de Alpelen en deile vaan Spaanje en Italië. In de zuidelike Nederlen en Midde-Duitsland woort 't Frankisch de volktaol; in de ander gebejer, behave in 't uterste zuie, leet de Frankische taol dudelike spore nao es superstraottaol.
Op 't groondgebeed vaan de Nederlen heet 't Frankisch taolgebeed ziech daonao nog wijer oetgebreid; aon de kös oontstoonte zoe taolvörm mèt e sterk Ingweoons substraot.
Kinmèrke vaan 't Frankisch in vergelieking mèt de ander Wesgermaanse dialekte zien 't laote valle vaan de twie zwakke verbeklasse (in tegestèlling tot 't Fries), behaajd vaan de versjèllende verbe-oetgeng in 't miervajd (1e persoen -ans, 2e -ath, 3e and, gein einheidsmiervajd wie 't Fries -a of 't Saksisch -ad), 't prefix ga- veur voltoejde particiepe en de döbbel oontkinning (en ... ni(u)t).
De Hoegduitse expansie maakde al snel 'n ind aon de relatief einheid in 't Frankisch, en deilde de taol in in Nederfrankisch, Middelfrankisch en Hoegfrankische dialecte. Allewijl besleit 't Frankisch taolgebeed hoonderde, zoeneet doezende dialekte. Oonder mie 't Limburgs, 't Nederlands en 't Duits (de staanderdtaol entans) zien Frankisch vaan karakter.
