Maassluis

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.

Ligking vaan Maassluis in Zuid-Holland

Maassluis is 'n stad en gemeinte in de Nederlandse provincie Zuid-Holland, aon de Nui Waterweeg, te weste vaan Vlaardinge en t'n ooste vaan Hoek van Holland, in de agglomeratie Rotterdam. De gemeinte had op 1 januari 2006 31.989 inwoeners en besleit 'n oppervlak vaan 10,11 km² (daovaan 1,51 km² water). Binne de gemeinte ligke gein ander kerne.

[bewirk] Stadsfuncties

Maassluis is 'n industrie- en forenzestad, in de periferie vaan Rotterdam. 't Industriekarakter vaan vreuger heet de stad, door de sloop vaan aw arbeiderswieke, gooddeils verlore.

[bewirk] Stadsgeziech

Kèrkeiland, Maassluis

In 't cintrum vaan Maassluis ligke mer relatief weineg aw gebouwe. 't Meis bezeensweerdeg is de Groete Kèrk (1629-1639), op 'n eilendsje wat me 't kèrkeiland neump, op de plaats vaan d'n awwe sjans. In de kèrk hingk 't bekind Garrelsörgel oet 1732. 't Aajd raodhoes is allewijl e sjeepvaartmuseum. Op 't memint (2006) bojt me in 'n boetewiek vaan Maassluis 'n nui kattelikke kèrk mèt e hendeg modern oontwerp, die es bijnaom "Sydney aan de Waterweg" gekrege heet (vaanwege de gliekenis mèt 't operagebouw vaan Sydney).

[bewirk] Historie

Maassluis oontstoont roond 1340 es Maeslantsluys, 'n neerzètting bij 'n sluus in 'n waterkiering vaan de reveer de Maos in 't amb Maasland. In 1489 woort 't gehöch geplunderd. In de zestiende iew lag me op bevel vaan Marnix van Sint-Aldegonde 'ne sjans aon. In 1614 woort de plaot, tot daan touw nog ummer in Maaslands bezit, door de Staote vaan Holland zelfstendegheid gegönd. Vieftien jaor later woort mèt de bouw vaan de Groete Kèrk begós. De handels- en vèssersplaots greujde daonao laanksem door. In 1811 kraog ze vaan Napoleon stadsrechte.

In de negentiende iew industrialiseerde de plaots door de kortbijheid vaan de Rotterdamse have: de sjleepvaort kaom in 't bezoonder op. In de twintegste iew zètde dees tendens ziech door, zeker ouch umtot 't havegebeed ziech ummer mie nao 't weste verplaotsde. Nao d'n oorlog kraog Maassluis mier 'n functie es forenzestad veur Rotterdam.

In de jaore zeveteg en tacheteg kaom de plaots negatief in 't nuits door 'ne gifbelt in de nuibouwwiek de Steendijkpolder. Dees polder waor in de jaore viefteg opgehoeg mèt slib oet de Rotterdamse have; dit had desastreus gevolge veur 't milieu in dees nuibouwwiek. Door de bebouwing waor sanering oonmeugelik.