Omaan

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.

Omaan


Officieel taol	Arabisch
Hoofstad	Muskat
Staotsvörm	Absolute Monarchie
Staotshoof	Qabûs-ibn-Saîd-al-Saîd (sins 1970)
Groondgebeed % water	309.500 km² 0%
Inwoeners	3 miljoen
Munt	Omaanse Reaal (OMR)
Tiedzaone	UTC +4
Nationale fiesdaag	???
Volkshymne	Nasjîd as-Salâm as-Sultâni
Landcode	OMN
TLD	.om
Tillefoon	+968

Omaan is e sultanaot in 't ooste vaan Arabië, aon de Indische Oceaan en de Perzische Golf. 't Land besteit oet 'ne bes vröchbere stroek land aon de kös en weuste in 't binneland. 't Land grèns aon de Vereinegde Arabische Emirate, Saoedi-Arabië en Jeme. Hoofstad is Muskat, wijers zien weineg stei vaan groeten umvaank. De ikkenomie is veural aofhenkelik vaan olie, en, plaotselik, vaan vèsserij.

[bewirk] Administratief indeiling

Omaan is verdeild in ach regio's, mintaqah geneump. Die zien weer in kleiner districte opgedeild, die wilayât heite.

Ad Dachiliyah
Al Batinah
Al Wusta
Ash Sharqiyah
Az Zahirah (ouch Ad Dhahirah)
Muskat
Musandam
Dhofar

[bewirk] Demografie

Allewel tot Omaan e normaol Arabisch laand liek, is de bevolking diverser. Alleriers zien behave de regulier Arabiere ouch Zuid-Arabiere inheims, die ziech aon hun taol, 't Zuidarabisch, laote herkinne (al is ze bekaans oetgestorve). In Dhofar lif e Semitisch volk wat gein Arabisch sprik. 't Aajdste volk evels zien de Baloeche, die vaan Perzischen oorsprunk zien.

De ganse bevolking is islamitisch, en de meiste lui hange d'n Ibaditischen islam aon. E meenderheid is soennitisch.

[bewirk] Historie

In d'n aajdheid woort de kös vaan Omaan, al bij de Soemeriërs es Magan bekind, door de Perze gekoloniseerd; in 563 v.Chr. woort 't es satrapie bij 't Perzisch Riek geïncorporeerd. Bij 't verval vaan 't Perzich Riek leej Omaan e slaopend bestoon. Nao de val vaan 't Romeins Riek en de Parte woort 't obbenuits deil vaan e Perzisch Riek. Oondertösse trokke versjèllende Semitische stamme in. In 632 vereuverde de Westelike Arabiere 't, die dao d'n Islam brachte. Good 'n iew later, in 751, stiechde ibaditische moslims 'n imamaat in Omaan, boedoor deze vörm vaan d'n islam typisch voor dat land woort. Dit imamaat blaof tot in de twintegste iew bestoon.

In 1508 naome de Portugeze de havestad Muskat in. Die behoolte ze tot in 1659 de Osmaanse Törke de 't gans land innaome. Wie de Törkse mach nao 1700 evels gebroke waor lökden 't 'ne lokaole sjeik, Ahmad bin Saîd, in 1741 't land te bevrije. Vaan häöm stamp d'n huidege sultan aof. In de negetiende iew breide de sultan zien bezittinge oet tot zelfs in Zanzibar; heer mós ze evels later weer aofstoon, en in 1891 kaom Omaan oonder Brits protectoraot.

In 1970 zètde prins Qabûs bin Saîd ziene pa, sultan Saîd ibn Taimur as-Saîd, aof, um in 1971 de oonaofhenkelikheid te verklaore. Sinsdeen heet 'r 't land e bitteke gemodèrniseerd, vaan e parlemint veurzien en Amerikaanse armeebases touwgelaote.

Len in Azië
Afganistan \| Armenië² \| Azerbaidzjan¹ \| Bahrein \| Bangladesj \| Bhoetaan \| Börma \| Broenai \| Cambodja \| Cyprus² \| Filipiene \| Georgië² \| India \| Indonesië \| Iraan \| Irak \| Israël \| Japan \| Jeme \| Jordanië \| Katar \| Kazachstan \| Kirgizië \| Koeweit \| Laos \| Libanon \| Maledive \| Maleisië \| Mongolië \| Nepal \| Noord-Korea \| Oesbekistan \| Omaan \| Oos-Timor \| Pakistan \| Palestiense Staot \| Papoea Nuuj-Guinea \| Rösland¹ \| Saoedi-Arabië \| Singapore \| Sjina³ \| Sri Lanka \| Syrië \| Tadzjikistan \| Thailand \| Törkieë \| Turkmenistan \| Vereinegde Arabische Emirate \| Viëtnam \| Zuud-Korea
Aafhenkelike gebejer: Akrotiri en Dhekelia² \| Gazastrook \| Hong Kong \| Makau \| Westelike Jordaanover
Status betwis: Palestiense Staot \| Sjina (nationalistisch) \| Sjina (volksrippebliek) \| Törks Cyprus
1. Dit land ligk gedeiltelik in Europa. 2. Dit land ligk geografisch in Azië, meh weurt óm cultureel en historische raejes bie Europa ingedeild. 3. Sins 1949 oonder twie regeringe verdeild.