Megalopul
From Wikipedia
 |
Cheest artícul al è scrivüü in koiné uçidentala, urtugrafía ünificada. |
Una megalopul l'è definida cumé un certu nümer de difereent arei metrupulitaan che cunt ul teemp a inn cressüü fin a saldass insema.
La parola megalopul l'è stada duperada per la prima völta in del 1957 dal geografu american Jean Gottmann a prupòsitt de l'area ürbanizada cumpresa tra i citaa de Boston, New York e Washington, ca l'e stada sturicameent la prima megalopul.
Ul svilüpp de l'ürbanesim in dii decenn püssee receent, a livell mundiall, l'a faa sì che un muntun de cunürbazziun s'inn slargaa assee da rivà a tucà chii vesin e a furma inscì una megalopul növa; in agjünta a la prima (suranuminada Bos-Wash), olter megalopul in del muunt a inn:
- San Diego - San Francisco, in California;
- Ruhr;
- Megalopul padana;
- Riu de Janeiro - San Paul - Campinas, in Brasil;
- Chicago - Pittsburgh, in de la zona dii Laach Graand;
- Tokyo - Yokohama, in Gjapun.
Un olter discuurs sa pö fà per chii citaa ca g'ann uramaj una pupulazziun e una dimensiun paragunabil a quela dii megalopul (per chii citaa chì ann inventaa la definizziun de megacitaa):
- Tokyo, circa 30 miliun de abitaant;
- San Paul, 20,2 miliun;
- Delhi, 19,7 miliun;
- Mumbai, 19,8 miliun;
- Citaa del Messich; 22,8 miliun;
- Seul, 22,3 miliun;
- Shanghai, 18,1 miliun;
- Los Angeles, 18 miliun.
In del muunt gh'inn almegn un desena de citaa ammò, minga graand cumé chii chi de suravìa ma che ga rivarann in d'un futüür vesin.
