Islam
De Vichipedie, la enciclopedie libare dute in marilenghe.
L'Islam, (إسلام, di pronunciâ "Islàm") che in arap al vûl disi "sotanance" o "dedizion" a Allah, e je dongje l’ebraisim e il cristianisim, une des trê grandis religjons monoteistichis. E je ultime par ordin cronologjic ma seconde par numar di fedêi daûr dal cristianisim. I soi fedêi si clamin musulmans (arap muslim, chel che al seguìs l'Islam) oben maometans.
Indis |
[cambie] Storie
L’Islam al è nassût cun la predicazion di Maomet (in arap Muhammad) tal VII secul d.d.C.
Maomet al nassè a la Mecca, in Arabie Saudide viers il 570 d.C.
A chel timp i araps a praticavin une forme dal rît di Allāh che al veve il so centri te valade da Mecca a ret dal sacrari de Ka'bah, che al jere un edifici a forme cubiche dulà che si adorave une meteorite. Secont la tradizion, la Ka'bah in origjin e custodive 360 dius,un par ogni dî dal calendari lunâr.
A pene che Maomet al fo plui grant, al contradì lis pratichis religjosis dal so timp. Al jere insodisfat pal politeism e la imoralitât praticade intes riunions religjosis. A la etât di 40 agns, mentri che si cjatave intune caverne dulà che par solit al leve a meditâ, la tradizion e vûl che un agnul, Gabriel, i comandàs di recitâ il non di Allāh. Dopo trê refûts e tantis insistencis dal agnul, Maomet si decidè a recitâ ad alte vôs chel che al fo po dopo considerât la prime serie di rivelazions che a fasin part dal Coran.
Si dîs che Maomet, ogni volte che al riceveve une rivelazion, le recitave a chei che i stevin dongje. Chescj a lôr volte lu imparavin a memorie. Dât che la fabricazion de cjarte e jere scognossude ai araps, lis rivelazions detadis di Maomet a vignivin scritis dai scritôrs su vues di camêl, fueis di palme, len o pergamenis.
Dome dopo la muart dal profete il Coran al cjapà la forme che al à vuê. Maomet al murì intal 632 d.d.C. e no vint lassât un erêt mascjo e nissun disponiment pe sô sucession, al vignì designât un sucessôr cuntune forme di elezion. I musulmans "sunnits" a acetarin il principi de funzion eletive partant a considerarin i "califs" come sucessôrs di Maomet. Par cuintri i musulmans "sciits", no son dacuardi parcè che a ritegnin che a direzi il mont musulman al devi jessi un dissendent di Maomet ancje se di linie laterâl.
L'Islam al continue la tradizion dal Ebraisim e dal Cristianisim e Maomet al sarès l'ultin dai grancj profetis dopo Adam, Abram, Mosè e Gjesù Crist.
[cambie] Libris sacris dal Islam
Il libri sacri pai musulmans al è il Coran dal arap Qur'an che al significhe "recitazion" o "leture ad alte vôs" e dulà che al ven contât che l'arcagnul Gabriel al rivelà a Maomet la potence di Diu (par arap Allah).Dongje dal Coran e je la racuelte dai insegnaments e de vite di Maumet che e je scrite te Sunna.
I musulmans a crodin che il Coran scrit in arabic al sedi la uniche vere font di rivelazion, parcè che a disin che Idiu par mieç dal agnul Gabriel al doprà la lenghe arabe par cjacarâ. Partant a refudin cualsisei traduzion in altris lenghis.
La osservance dai insegnaments di chescj libris e fasarà sì che l'om, tal judizi finâl, al vignedi mandât in paradîs o tal infier.
I musulmans a crodin che la lôr fede a sedi l'adempiment des rivelazions dadis ai ebreus e ai prins cristians fedêi.
[cambie] Precets
Diu al è unic e no indi è altris come Lui.
L'om al à une anime che a vîf dopo muart e al pues vê destins diviers: o un paradîs celest o il cjastì intal infier.
L'Islam al à cinc precets principâi e cinc crodincis fondamentâls. I pilastris de fede a son:
- Fede intun unic Diu, Allāh
- Fede intai agnui
- Fede in tancj profetis (Adam, Abram, Moisès, Jesus, Maomet), ma intun sôl messaç
- Fede intune dì dal judizi
- Fede inte potence di Diu e intal fat che lui al determine i acjadiments.
I pilastris de adorazion e son:
- Ripetizion dal credo: A nol è Diu fûr di Allāh e Maomet al è il messazîr di Allāh.
- Preiere cinc voltis al dî voltâts viers la Mecca
- Caritât, oblic di dâ une percentuâl de proprietât comprendût i redits
- Dizun, in particolâr il Ramadan che al dure un mês
- Pelegrinaç, i mascjos a devin fâ un viaç a la Mecca almancul une volte inte lôr vite. A son dispensâts i malâts e i puars.
Il lôr lûc di preiere e je la Moschee.
[cambie] L'Islam vuê
Cuasi il 90% dai musulmans a son Sunnits, cirche il 10% (in particolâr in Persie, e cuntune fuarte presince in Iraq, in Liban e intal Bahrain) a son Sciits.
[cambie] Leams esternis
- (talian)Portâl talian sul Islam
- (talian) Selezion di gjornâi islamics par talian
