ഫിലിപ്പിയര്‍ക്ക് എഴുതിയ ലേഖനം
വിക്കിപീഡിയ, ഒരു സ്വതന്ത്ര വിജ്ഞാനകോശം.
 |
വിക്കിപീഡിയയുടെ ഗുണനിലവാരത്തിലും, മാനദണ്ഡത്തിലും എത്തിച്ചേരാന്‍ ഈ ലേഖനം വൃത്തിയാക്കി എടുക്കേണ്ടതുണ്ട്‌. ഈ ലേഖനത്തെക്കുറിച്ച് കൂടുതല്‍ വിശദീകരണങ്ങള്‍ നല്‍കാനാഗ്രഹിക്കുന്നെങ്കില്‍ ദയവായി സംവാദം താള്‍ കാണുക. |
മാസിഡോണിയയിലെ (ഗ്രീസിലെ) ഒരു നഗരമായിരുന്നു ഫിലിപ്പി. ഈ നഗരത്തില്‍ വച്ച് 42 ബി. സി. ഇല്‍ നടന്ന യുദ്ധത്തില്‍ ആണ്‌ മാര്‍ക്ക് ആന്റ്റണിയും ഒക്ടേവിയനും ബ്രൂട്ടസിന്റെയും കാഷ്യസിന്റെയും സൈന്യത്തെ തോല്പിച്ച് റോമാസാമ്രാജ്യത്തിന്റെ അധികാരം കൈക്കലാക്കിയത്.[1]. പൌലോസ്‌ തന്റെ രണ്ടാം പ്രേഷിതയാത്രാവേളയില്‍ (49 ഏ. ഡി. ഇല്‍) ഫിലിപ്പിയിലെ സഭയ്ക്ക്‌ അടിസ്ഥാനമിട്ടു (അപ്പ 16:12-40). അങ്ങനെ യൂറോപ്പില്‍ ക്രിസ്തുമതം സ്വീകരിച്ച ആദ്യത്തെ നഗരമായിരുന്നു, ഫിലിപ്പി.
ഫിലിപ്പിയിലെ ക്രൈസ്തവര്‍ പൌലോസിനു പലപ്പോഴും സഹായമെത്തിച്ചുകൊടുക്കുമായിരുന്നു (ഫിലി 4:16; 2 കോറി 11,9). അതിനെല്ലാം നന്ദി രേഖപ്പെടുത്തുകയും, ഫിലിപ്പിയിലെ വിശ്വാസികളുടെ ജീവിതരീതികളില്‍ പൌലോസിനുള്ള സംതൃപ്തിയും താത്പര്യവും അവരെ അറിയിക്കുകയുമാണ്‌ ഈ ലേഖനത്തിന്റെ ഉദ്ദേശ്യം. എഫേസോസുകാര്‍ക്കും കൊളോസോസുകാര്‍ക്കും ഫിലെമോനും ഉള്ള ലേഖനങ്ങളെപ്പോലെ ഫിലിപ്പിയര്‍ക്കുള്ള ലേഖനത്തെയും ബന്ധനകാലലേഖനമായാണ്‌ കരുതിപ്പോരുന്നത്‌. കാരഗൃഹത്തില്‍ വച്ച് എഴുതുന്നതാണെന്ന് പൌലോസ്‌ ഈ ലേഖനത്തിലും ആവര്‍ത്തിച്ചു പറയുന്നുണ്ട്‌ (1:7; 12-17). റോമായിലെ കാരഗൃഹവാസമാണോ, അതോ എഫേസോസിലേതാണോ ഇവിടെ വിവക്ഷിക്കപ്പെടുന്നത്‌ എന്ന് ഖണ്ഡിതമായി പറയാനാവില്ലെങ്കിലും, ആദ്യത്തേതാകാനാണ്‌ കൂടുതല്‍ സാധ്യത. അങ്ങനെയെങ്കില്‍, ഏ. ഡി. 58-നും 60-നും ഇടയ്ക്കായിരിക്കണം ഈ ലേഖനം രചിക്കപ്പെട്ടത്‌.
ഈ ലേഖനത്തിന്റെ തുടക്കത്തില്‍, ആമുഖം, കൃതജ്ഞത, പ്രാര്‍ത്ഥന, സുവിശേഷപ്രചാരത്തെ സംബന്ധിച്ച വാര്‍ത്തകള്‍ (1:1-27) എന്നിവയ്ക്കുശേഷം, ക്രിസ്തുവിശ്വാസം സ്വീകരിച്ചവര്‍ക്കുണ്ടായിരിക്കേണ്ട സ്ഥിരത, ഐക്യം എന്നീക്കാര്യങ്ങളെക്കുറിച്ചുള്ള ഉപദേശങ്ങള്‍ ആണ്‌ അടങ്ങിയിരിക്കുന്നത്‌ (1:28-2:2). തുടര്‍ന്ന്, സമകാലീനക്രിസ്തുവിജ്ഞാനീയത്തിന്റെ രത്നച്ചുരുക്കം അപ്പസ്തോലന്‍ അവതരിപ്പിക്കുന്നു (2:3-49). യേശു തന്നെത്തന്നെ ശൂന്യനാക്കി, പിതാവിനോടുള്ള പരിപൂര്‍ണ്ണ വിധേയത്വത്തില്‍, കേവലം ഒരു അടിമയെപ്പോലെ കുരിശുമരണത്തിനുപോലും സന്നദ്ധനായതുകൊണ്ട്‌ പിതാവായ ദൈവം അവിടുത്തെ മഹത്വപ്പെടുത്തി. ഈ മാതൃകയാവണം ഓരോ ക്രൈസ്തവനും സമൂഹത്തിനുവേണ്ടി തന്റെ അവകാശങ്ങളെ ബലികഴിക്കാനും തന്നെത്തന്നെ സമര്‍പ്പിക്കാനും പ്രചോദനം നല്‍കുന്നത്‌ (2:3-11). നിസ്വാര്‍ത്ഥസേവനത്തിലൂടെ ലോകത്തിന്റെ പ്രകാശമായിരിക്കാനുള്ള ആഹ്വാനവും (2:19-3:1) നല്‍കിയതിനുശേഷം പരിച്‌ഛേദനവാദികളെ അകറ്റിനിര്‍ത്തേണ്ടതിന്റെയും (3:2-7) ക്രിസ്തുവിന്റെ പുനരുത്ഥാനത്തിലെ പുതുജീവനിലേക്കു പ്രവേശിക്കാന്‍ വേണ്ടി അവിടുത്തെ സഹനത്തിലും മരണത്തിലും പങ്കുചേരേണ്ടതിന്റെയും (3:8-11) ആവശ്യകതയെ അപ്പസ്തോലന്‍ ഊന്നിപ്പറയുന്നു. യേശുവിന്റെ ആത്മാവും ദൈവത്തോടും മനുഷ്യരോടും കൂടുതല്‍ അടുക്കുന്നതിന്റെ ഫലമായുണ്ടാകുന്ന ക്രിസ്തീയസന്തോഷവും സമാധാനവും എന്നും നിലനിര്‍ത്താന്‍ നാം ശ്രമിക്കേണ്ടതാണ്‌ എന്നു അപ്പസ്തോലന്‍ തുടര്‍ന്ന് ഉദ്ബോധിപ്പിക്കുന്നു (3:12-4:9). ഫിലിപ്പിയിലെ വിശ്വാസികള്‍ അപ്പസ്തോലനു നല്‍കിയ സഹായത്തിനു കൃതജ്ഞതയും അവര്‍ക്കെല്ലാം അഭിവാദനങ്ങളും അര്‍പ്പിച്ചുകൊണ്ടു (4:10-23) ലേഖനം ഉപസംഹരിക്കുന്നു.[2]
[തിരുത്തുക] ഗ്രന്ഥസൂചി
- ↑ Archaeological Sites in Macedonia
- ↑ ബൈബിള്‍, രണ്ടാം പതിപ്പ്, KCBC ബൈബിള്‍ കമ്മീഷന്‍, Pastoral Orientation Center, കൊച്ചി 682025
