Eske
Vun Wikipedia
Eske is een plattdüütschen Naam för Deerns. Besunners in Oostfreesland is düsse Naam begäng.
[Ännern] Herkamen
Eske is een korte Form vun den olen bibelschen Naam Elisabeth. De kümmt ut de Hebreesche Spraak. Dor heet he אֱלִישֶֽׁבַע (Elischeba). Dor steckt de beiden Wöör in : Eli (Mien Gott) un Scheba (Eed). Tohopen bedutt dat so veel, as: Een Eed is mien Gott, free öbersett: Up mienen Gott kann ik mi verlaten.
[Ännern] Bibel
In dat Ole Testament gifft dat een Elischeba. Dat is de Froo vun Mose sienen Broder Aaron un de Mööme vun all Preesters in Israel (2.Mose 6,23). In dat Nee Testament gifft dat een Elisabeth , de vun Elischeba afstammen deit. Dat is de Froo vun Zacharias un Johannes den Döper siene Mudder (Lukas 1).
[Ännern] De oostfreesche Naam
Eske is de tosamentrocken Form vun Elisabeth mit dat kort Anbacksel (Suffix) -ke, wat in de nedderdüütsche Spraak faken bruukt worrn is, wenn wat lütt maakt weern scholl (Diminutiv). Een kann sik dat so vörstellen: Ut Elisabeth warrt Else. Ut Else warrt mit dat Anbacksel denn Elske. Un ut Elske warrt Eske. Dat bedutt denn so veel, as Lütt Elisabeth. In de annern plattdüütschen Kuntreien buten Oostfreesland is de korte Form vun Elisabeth Lieken oder Lüke. In de Nedderlannen gifft dat den Naam Eske ok.
Een van de bekannt Lüüd, de de Naam hebbt is Eske Nannen, Fru von Stern-Herutgeaver Henri Nannen un Baas van de Emder Kunstmuseum.
Kiek ok nah bi de List vun plattdüütsche Vörnaams.
