Maike

Vun Wikipedia

Maike oder Meike is een plattdüütschen Vörnaam för Deerns.

[Ännern] Herkamen

Maike kümmt vun den olen Naam Marie her. De kümmt nu wedder vun den latienschen Naam Maria. Dat is de Mudder vun Jesus, un allerhand annere Froonslüde in de Bibel dreegt ok düssen Naam. He kümmt vun den hebreeschen Naam Mirjam, wo nich ganz klaar is, wat de bedüden schall. Kann angahn, dat kümmt ut de ägyptische Spraak, denn heet dat woll : „Mien Söten“, man dat kann ok ut de hebreesche oder aramääsche Spraak herkamen. Denn mag dat woll heten: „De Bittersöte“, oder „De Smucke Deern“, oder „Dat Mastveeh“, „De nich to tähmen is“ oder ok„De vun Gott hooch böört warrt“. Genau kann een dat nich seggen.

[Ännern] De plattdüütsche Naam

As dat fröher begäng weer, hett de Deernsnaam Marie een Anbacksel kregen, wat düssen Naam wat lüttjer maken dö (Diminutiv). Dat weer dat Anbacksel (Suffix) -ike. So is ut den Naam Marie denn de Naam Marieke wurrn. Mit de Tiet is düsse Naam bi de mundfulen Plattdüütschen tosamentrocken un afslepen wurrn. Amenn keem dor denn de Naam Maike oder Meike bi rut. Düsse Naam is hüdigendags noch ganz begäng.

Kiek ok nah bi de List vun plattdüütsche Vörnaams