Belfast
Frå Wikipedia – det frie oppslagsverket
Belfast (irsk Béal Feirste, munninga av Farset) er den største byen i Nord-Irland. Belfast er hovudstad for provinsen Nord-Irland, som er ein del av det sameinte kongeriket Storbritannia og Nord-Irland. Frå 1973 har byen vært et administrativt distrikt, som òg omfattar området rundt.
Byen har sitt irske namn etter elva Farset, som for det meste er lagd i røyr under byen. Elva Lagan er no den viktigaste i området. Byen ligg ved munninga av Lagan, ved Belfast Lough. Byen er omgjeven av fjell, mellom anna Black Mountain, Cavehill og Castlereagh Hills.
Sentrum av byen har fyrst på 2000-talet vorte opprusta kraftig, spesielt området ved elva. I store område er det ikkje lov med bilkøyring. Dei viktigste bygga er frå viktoriansk og edvardiansk tid. Av desse kan nemnast Queen's University (1849), rådhuset (1903) og Ulster Bank (1860).
Byen har den største tørrdokken i verda, ved Harland and Wolff skipsverft. Dei to enorme kranane Samson og Goliath er kjende landemerke. Verftet er spesielt kjend for å ha konstruert skipet RMS «Titanic».
Byen har to flyplassar: Belfast City Airport ved Belfast Lough, og Belfast International Airport ved Lough Neagh.
Byen har lenge vore delt i katolske og protestantiske område. Etter at konflikta i Nord-Irland starta i slutten av 1960-åra har det vorte oppretta sperringer mellom bydelar. Store delar av sperringane er framleis på plass. Etter at Det provisoriske IRA annonserte våpenkvile i 1997 har det vore relativt fredeleg i byen.
Den nordlege delen av byen er kjend for sine politiske veggmåleri. I det protestantiske området kring Shankill Road finn ein maleri som uttrykkjer lojalitet til Storbritannia. I katolske område som Falls Road og Ardoyne er republikanske ideal som vert framstilt.
Trass i problem med opptøyar og terrorisme har Belfast vore eit trygt reisemål, så lenge ein ikkje oppheld seg så mykje i militante område. Ingen turistar er omkomne i terroråtak. Åtaka har stort sett har vore retta mot Tryggingsstyrkane, eller mot område der stort sett berre ibuarar i byen ferdast. I tillegg har andre former for kriminalitet vore mindre utbreidd i bykjerna enn i andre byar på storleik med Belfast. Mykje av grunnen kan vera det store talet på politi.
