Dronning Sonja av Noreg
Frå Wikipedia – det frie oppslagsverket
Hennar Majestet dronning Sonja (f. 4. juli 1937) er dronning av Noreg sidan 1991. Ho er gift med kong Harald V av Noreg.
Sonja blei fødd i Oslo som Sonja Haraldsen, dotter til Dagny (1898–1994) og Karl August Haraldsen (1889–1959). Ho vart gift med kronprins Harald den 29. august 1968, og vart då kronprinsesse Sonja.
Innhaldsliste |
[endre] Utdanning
Sonja Haraldsen vaks opp på Vinderen i Oslo og tok realskule-eksamen i 1954. Ho utdanna seg i kjole- og draktsaum ved Oslo yrkesskule. Deretter reiste ho til Sveits og tok eksamen ved l'Ecole Professionelle de jeunes Filles i Lausanne. Undervisinga omfatta òg samfunnsfag, rekneskap og moteteikning. Seinare tok dronninga artium som privatist. Etter å ha avlagt eksamen i faga fransk, engelsk og kunsthistorie ved Universitetet i Oslo fekk ho tittelen cand. mag.
[endre] Ekteskap
Sonja Haraldsen møtte kronprins Harald fyrste gong i 1959. Ni år seinare vart det klart at ho fekk gifta seg med sin utvalgde. I mars 1968 kom meldinga om at kong Olav hadde gjeve løyve til at kronprinsen fekk gifta seg borgarleg. Trulovinga gav støtet til eit ordskifte om monarkiet si framtid i Noreg. Motstanden mot at kronprinsen gifta seg borgarleg var langt mindre enn mange hadde frykta. Kronprinsesse Sonja vart frå fyrste stund godteke av folket som medlem av det norske kongehuset. Den 29. august 1968 stod bryllupet i Oslo Domkyrkje.
[endre] Dronning
Då kong Olav V døydde den 17. januar 1991, overtok kronprins Harald som konge. Sonja vart då den fyrste dronninga i Noreg på 53 år. Etter at dronning Maud av Noreg døydde i 1938 hadde det ikkje vore ei norsk dronning. Dronning Sonja var med kong Harald då han avla eid til forfatninga i Stortinget den 21. januar 1991. For fyrste gong på 69 år var ei dronning til stades i Stortingssalen. Seinare har dronninga vore med når kongen har lese Trontala under den høgtidelege opninga av Stortinget. Etter eige ynskje vart kongeparet signa i Nidarosdomen i Trondheim den 23. juni 1991.
[endre] Prisar og utmerkingar
Som dei andre medlemmene av den norske kongefamilien er dronning Sonja fadder for ei rekkje organisasjonar. I 1982 blei ho sjølv tildelt Nansenprisen.
Sonja er den første dronninga nokonsinne som har vitja Antarktis. Dette skjedde i 2005, då ho opna ein norsk forskingsstasjon i Dronning Maud Land.
Born:
- Prinsesse Märtha Louise fødd 1971
- H.K.H. Kronprins Haakon, fødd 1973