Karl XIV Johan av Sverige
Frå Wikipedia – det frie oppslagsverket
| Konge av Sverige og Noreg | 5. februar 1818-8. mars 1844 |
| Føregjengar | Karl II (XIII) |
| Etterfylgjar | Oscar I |
| Fødd | 26 januar 1763 iPau i Frankrike |
| Død | 8 mars 1844 i Stockholms slott |
| Gift med | Desideria |
| Barn | Oscar |
| Gravlagd | Riddarholmskyrkan i Stockholm |
| Valspråk | Folkets kärlek min belöning |
Karl III Johan (1763-1844) var norsk og svensk konge frå 1818. I Sverige vert han kalla Karl XIV Johan.
Jean-Baptiste Bernadotte var fødd 26. januar 1763 i Pau i Frankrike. Han gjekk inn i militæret der han gjorde ein glitrande karriere, frå vanleg menig til divisjonsgeneral i tida frå 1780 til 1794.
Han gifta seg 16. august 1798 med Désirée Clary som sidan vart norsk og svensk dronning under namnet Desideria. Ho hadde tidlegare vore trulova med Napoleon Bonaparte, og syster hennar var gift med bror hans, Joseph Bonaparte, som var konge av Napoli 1806-08 og av Spania 1808-13.
Bernadotte var ei tid fransk ambassadør i Wien før han blei fransk krigsminister omtrent same tid som han fekk sonen Oscar i 1799. I 1804 ble han så guvernør og sjef for den franske arméen i Hannover. Han blei òg opphøgd til fyrste av Ponte Corvo i Italia som løn for innsatsen sin i slaget ved Austerlitz. Seinare mista han likevel noko av Napoleon sin tillit.
Då den nyleg adopterte kronprinsen Christian August av Augustenborg døydde i 1810 stod Sverige brått utan tronarving. Svenskane baud stillinga til Jean-Baptiste, som takka ja og tok namnet Carl Johan.
I 1813 gjekk Sverige under Carl Johan med i den sjette koalisjonen mot Napoleon. Kronprinsen utmerka seg i fleire slag, særleg i slaget ved Leipzig i 1813. For innsatsen fekk Carl Johan løfte frå koalisjonsvenen om å få Noreg som løn.
Då det var klart at det endelege nederlaget til Napoleon snart ville koma gjekk Carl Johan til åtak på Danmark og tvang kong Frederik VI til å slutta fred i Kiel den 14. januar 1814. Kongen av Danmark-Norge måtte avstå Noreg til kongen av Sverige. Carl Johan skal personleg ha endra ordlyden i det første utkastet, som sa at Noreg skulle tilhøyra og innlemmast i kongeriket Sverige. Ved å gje Norge status som eige kongerike unngjekk Carl Johan å provosera norsk opinion, som uansett blei opprørt over å ha blitt avstått av sin eigen konge uten å vera spurt.
Carl Johan blei krona til konge den 11. mai 1818 i Sverige og den 7. september same året i Noreg. Hovudgata i Oslo er oppkalla etter kong Karl Johan, og det står ein ryttarstatue av han på slottsplassen i Oslo.
