Per Kleiva
Frå Wikipedia – det frie oppslagsverket
Per Kleiva (fødd 1. april 1933 i Torsken) er ein norsk biletkunstnar som har arbeidd mest med måleri og grafikk. Han vaks opp i Troms, på Sunnmøre og i Gulen i Sogn, no bur han på Nesodden. Han er særleg kjend for måleria sine i op- og pop-kunst stil og for dei grafiske blada gjort i silketrykk i tida han var tilknytta kunstnarkollektivet GRAS. Han var ein av dei leiande politisk engasjerte kunstnarane på 1960- og 70-talet.
[endre] Utdanning
Han studerte under Per Krogh på Statens Kunstakademi i åra 1955 til 57. Før det hadde han teke kveldskurs på Bergen Kunst- og Håndverksskole og på Vestlandets Kunstakademi. I 1959 studerte han under Niels Lergaard på Kunstakademiet i København og han har også studert ved Kunstakademiet i Firenze og Kunstakademiet i Stockholm. Frå 1961 til 65 var han assistent hjå Sigurd Winge.
[endre] Utstillingar
Han debuterte på Statens Kunstutstilling (Haustutstillinga) i 1963 og hadde den fyrste separatutstillinga si året etter på Galleri 27 i Oslo. Sidan har han hatt ei lang rekkje separatutstillingar både innanlands og utanlands, og han har og delteke på mange gruppe- og kollektivutstillingar. I tillegg har han stått for utsmykkinga av ei rekkje offentlege og private bygg.
[endre] Per Kleiva sin kunst er innkjøpt til desse offentlege samlingane
- Nasjonagalleriet
- Riksgalleriet
- Museet for samtidskunst
- Bergen Billedgalleri
- Oslo kommunes kunstsamlinger
- Trøndelag Kunstgalleri
- Christiansands kunstgalleri
- Henie-Onstad Kunstsenter
- Nord-Norsk Kunstmuseum, Tromsø
- Århus Kunstmuseum, Danmark
- Arkivmuseet i Lund, Sverige
- Künsthalle Rostock, Tyskland
- Nasjonalmuseet i Warzawa, Polen
- Gullbenkian, Lisboa, Portugal
