Skien

Frå Wikipedia – det frie oppslagsverket

Våpen	Kart

Grunnleggjande opplysningar
Kommunenr:	0806
Fylke:	Telemark
Administrasjonssenter:	Skien
Flatevidd:	778 km²
Folketal:	50 761 (2006)
Målform:	Nøytral
Internettside:	www.skien.kommune.no
Politikk
Ordførar:	Rolf Erling Andersen (Ap) 2003-2007

Skien er ein kommune, administrasjonssenter og største by i Telemark fylke. Kommunen grensar til Sauherad og Kongsberg i nord , Siljan i aust, Porsgrunn og Bamble i sør, og til Drangedal og Nome i vest. Byen er ein av dei eldste byane i Noreg, og har røter attende til år 900.

Skien er den tiande største byen i Noreg. Kommunen har ei flatevidd på 778 km², der om lag 479 km² er skogareal, 46 km² jordbruksareal og 57 km² ferskvatn. Dei 197 km² som er igjen er byområde, bustadområde og industriområde.

Det eldste bygget i kommunen er Gjerpen kyrkje, bygd før 1150. Det høgaste punktet er Skårrafjellet, 814 moh.

[endre] Historie

Skien voks fram der fallet frå Hjellevannet hindra vidare skipsfart oppetter Skienselva. Det tidlegaste dokumentet som visar byprivilegier er frå 1358. Utbygging av industri tok til på 1500-talet, med gruvedrift i Glasergruva, Fossum Jernverk og sagbruk som nytta fossefallet. Tømmerfløyting på elva kom i gang på 1600-talet, og Skien vart eksporthamn for tømmer og plank og importhamn for korn. Landhevinga og utviklinga i skipsfarten hadde etter kvart gjort byen vanskeleg å nå med handelsskip, og ladestadene Porsgrunn, Brevik og Langesund voks fram på 1600-talet. Utover 1700-talet gjekk det attende med Skien medan ladestadene voks. Byen fekk ny framgang som industriby, kommunikasjonsknutepunkt og administrasjonssenter i fylket. I 1873 vart Union Bruk etablert. Norsjø–Skienkanalen vart bygd i perioden 1854–1861, Bandak-Norsjøkanalen vart opna i 1892. Skien fekk jernbanesamband via Vestfoldbanen i 1882 og Bratsbergbanen i 1917.

Ei rad store brannar har herja byen opp gjennom åra, i 1652, 1671, 1681, 1732, 1766, 1777 og sist i 1886, vart store delar av byen lagt i oske. Gateplanen i sentrum vart fastlagt etter brannen i 1886.

I 1964 vart Skien by slegen saman med herada Solum og Gjerpen og Valebø krins av Nome til storkommunen Skien. Kommunegrensene har lege fast etter ei mindre grenseregulering mot Porsgrunn i 1968.

[endre] Tilknytte Skien

Henrik Ibsen vart fødd i Skien i 1828 og budde i Skiensområdet til han var 16 år. Den store diktaren har gjeve namn kulturhuset i byen, Ibsenhuset.

Odds Ballklubb er ein av dei eldste fotballklubbane i landet, stifta i 1894.

[endre] Kjende personar frå Skien

Henrik Ibsen (1828-1906), forfattar og dramatikar
Hjalmar Johansen (1867-1913) polfarar og idrettsmann
Tor Åge Bringsværd (f. 1939), forfattar

[endre] Skienssongen

La sangen nu seg svinge i toners flukt mot sky,
begeistret skal den klinge til ære for vår by.
Ja, Skien vil vi hedre i toner og i ord,
den er fra våre fedre, for oss en arv så stor.

Heile Skienssongen i tekst og lyd.