Grigu simi
Wikipidiyaman
Grigu simi (Ελληνική γλώσσα) nisqaqa grigukunap rimayninmi. Ñawpa pacha lliw anti Iwrupapim rimarqanku, aswan yachaqkuna Grisyapi kaptinmi. Grigu simitaqa grigu siq'i llumpa nisqawan qillqanku.
Chay rimaypiqa achka chaninchasqa qillqakunatam rurarqanku, ahinataq Platon-pa qillqasqan Politeia (Πολιτεία: mama llaqta tantari) icha Aristotelis-pa qillqasqan Organon (Όργανον).
Dyuspa Simin Qillqap Musuq Rimanakuynin (Καινή Διαθήκη) grigu simipi qillqasqam. Mawk'a Rimanakuy iwriyu simipi kaptinmi, grigu rimaq hudyukuna grigu simiman t'ikrarqan (latin simipi septuaginta, "qanchis chunka").
Bisantyu qhapaq suyup simin karqan. Turkukuna Bisantyu llaqtata atipaptin, grigu simip chaninchasqa kaynin chinkarqan.
Kunanqa musuq grigu simi nisqaqa Grisya, Kipru mama llaqtakunap ufisyal siminmi.
