Kloroplas

Ti Wikipédia, énsiklopédi bébas

Jeroan kloroplas pinuh ku granum

Kloroplas téh organél nu aya dina sél tutuwuhan jeung ganggang eukariot nu bisa ngayakeun potosintésis. Kloroplas nyerep énérgi cahya ti panonpoé pikeun ngahasilkeun énérgi bébas nu diteundeun dina ATP jeung NADPH dina prosés potosintésis.

[édit] Asal-usul

Kloroplas mangrupakeun salah sahiji bentuk plastid, sarta sacara umum dianggap 'turunan' sianobaktéri éndosimbiotik. Dina lebah dieu, kloroplas téh sarimbag jeung mitokondria, tapi kloroplas mah ukur aya di tutuwuhan jeung protista. Dua organél ieu dikubeng ku dua lapis pinding nu dipisahkeun ku rohangan antarmémbran boga DNA sorangan nu aub dina métabolisme énérgi, sartaboga rétikulasi (krista) nu ngeusi rohangan jero.

Dina tutuwuhan héjo, kloroplas téh dikubeng ku dua mémbran lipid ganda. Kiwari, mémbran jero dianggap patali jeung mémbran luar sianobaktéri karuhunna. Génom kloroplas lajeng ngurangan dibanding jeung sianobaktéri nu hirup bébas, tapi sésa nu aya écés nunjukkeun kasaruaanana. Gén-gén anu leungit téh lolobana pindah, disandikeun di génom inti inangna.

Penting kauninga ogé, yén dina sababaraha ganggang (kayaning heterokont jeung protista lianna kawas Euglenozoa jeung Cercozoa), kloroplas téh siga nu tumuwuh ngaliwatan kajadian éndosimbiosis sekundér, nalika sél eukariot 'ngalegleg' sél eukariot kadua nu ngandung kloroplas, sahingga ngabentuk kloroplas nu dibungkus ku tilu atawa opat lapis mémbran. Dina sababaraha kajadian, éndosimbion sekundér ieu dilegleg deui ku eukariot lianna, sahingga ngabentuk éndosimbion tersiér.

[édit] Struktur

Kloroplas téh bentukna buleud gepéng nu diaméterna 2-10 mikrométer, sedengkeun kandelna 1 mikrométer. Kloroplas boga dua lapis mémbran nu disebut mémbran luar jeung jero. Dua mémbran ieu dipisahkeun ku rohangan antarmémbran.

Cairan dinajero kloroplas disebut stroma, sarupa jeung sitoplasma baktéri, sarta ngandung DNA sirkulér leutik nu jeung ribosom, najan kalolobaan protéinna mah disandi ku gén nu aya di inti, nu produk protéinna diangkut ka jero kloroplas.

Stroma téh pinuh ku tumpukan tilakoid, sub-organél tempat potosintésis nu sabenerna. Tilakoid ieu bentukna buleud gepéng, nu jerona rohangan kosong nu disebut rohangan tilakoid atawa lumén. Tilakoid ieu disusun numpuk, sarta sasusunan tilakoid disebutna granum. Réaksi potosintésis lumangsung dina mémbran tilakoid, sarta, sarupa jeung dina mitokondria, ngawengku aliran biosintésis antarmémbran.

[édit] Baca ogé

Mémbran kloroplas

Mémbran jero
Mémbran luar

Daur Calvin

[édit] Sumber rujukan

Chloroplast, Wikipédia édisi basa Inggris (2 Juni 2006)
Artikel ieu ngandung bahan-bahan ti Science Primer nu medal ti NCBI, nu, salaku publikasi pamaréntah AS, aya dina domain publik (1).

[édit] Tumbu kaluar

Organél sél
Kloroplas \| Mitokondria \| Séntriol \| Rétikulum éndoplasma \| Awak Golgi \| Lisosom \| Miofibril \| Nukleus \| Peroxisom \| Ribosom \| Vakuol \| Vésikel

Disalin ti "http://su.wikipedia.org../../../k/l/o/Kloroplas.html"

Kategori: Organél | Potosintésis