Maung totol

Ti Wikipédia, énsiklopédi bébas

Maung Tutul

Status konservasi: Lower risk (lc)

Maung Tutul Aprika di Kénya

Klasifikasi ilmiah

Kingdom:	Animalia
Filum:	Chordata
Kelas:	Mamalia
Ordo:	Karnivora
Famili:	Felidae
Génus:	Panthera
Spésiés:	P. pardus

Ngaran binomial

Panthera pardus
(Linnaeus, 1758)

Maung Tutul (Macan Tutul, Leopards, Panthera pardus) mangrupakeun salah sahiji ti opat 'maung' dina genus genus Panthera. Dedeganana teu sarua, ti mimiti panjang saméter nepi ka ampir dua méter, nu rata-rata beuratna antara 30-70 kg. Nu jalu bisa leuwih ti 90 kgs, sedengkeun bikangna mah kira dua pertiluna. Ditilik tina ukuranana mah, maung tutul téh kaasup bangsa ucing pangkuatna sanggeus jaguar. Maung Tutul lolobana boga bulu konéng-emas kalawan tutul hideung bentuk kembang

Maung kumbang (panther) mangrupakeun maung tutul (atawa jaguar) mélanistik, boga mutasi nu ngabalukarkeun leuwih lobana produksi pigmén hideung (eumélanin) batan pigmén konéng emas (péomélanin). Hasilna, bulu ieu maung jadi ampir hideung meles, da mun disidikkeun mah tutulna téh masih bisa katempo. Lian ti kumbang, aya ogé maung bodas.

Najan ukuranana badag, sato nu sok liar peuting sarta prédator arboréal téh hésé kawénéhanana.

[édit] Subspésiés

Maung Tutul India

Aya kira 7-30 subspésiés maung tutul (salah sahijina geus lastari), najan teu sakabéhna ditampa ku para ahli:

Maung Tutul Aprika, Panthera pardus pardus (lower risk, least concern)
Maung Tutul Amur*, Panthera pardus orientalis (critically endangered)
Maung Tutul Anatolia, Panthera pardus tulliana (critically endangered or possibly extinct)
Maung Tutul Arab, Panthera pardus nimr (critically endangered)
Maung Tutul Barbar, Panthera pardus panthera (critically endangered)
Maung Tutul India*, Panthera pardus fusca (lower risk, least concern)
Maung Tutul Indo-Cina*, Panthera pardus delacouri
Maung Tutul Iran*, Panthera pardus saxicolor
Maung Tutul Jawa*, Panthera pardus meas (kaancam lastari)
Maung Tutul Judean Desert, Panthera pardus jarvesi (kamungkinan lastari)
Maung Tutul Cina Kalér*, Panthera pardus japonensis (kaancam lastari)
Maung Tutul Sinai, Panthera pardus jarvisi
Maung Tutul Sunda, Panthera pardus sondaicus (kaancam lastari)
Maung Tutul Arab Kidul, Panthera pardus nimr (critically endangered)
Maung Tutul Sri Langka*, Panthera pardus kotiya (kaancam lastari)
Maung Tutul Zanzibar, Panthera pardus adersi (lastari)

[édit] Maung Kumbang

Maung Tutul pseudo-mélanistik boga kelir dasar nu normal, tapi kusabab tutulna kerep pisan, katémbongna kawas hideung meles. Di sababaraha spésiés, bagian nu kelirna hideung téh ngalegaan, sahingga ukur nyésakeun garis coklat nu nunjukkeun kelir dasar

Dina hiji makalah ngeunaan maung kumbang Asia, Pocock migunakeun poto kulit maung tutul ti India kidul; tutulna baradag, nu masing-masing ngandung sababaraha tutul sahingga kawas jaguar atawa méong congkok. Kulit maung tutul Pocock lianna di India kidul tutulna normal, tapi pigmén tambahanana loba pisan sahingga kawas maung kumbang tutul konéng.

[édit] Ciri pangbéda

Maung, utamana nu tutul, kadang sok pahili antara nu hiji jeung nu séjénna, komo mun nempona di kebon binatang atawa poto. Maung Tutul (leopard) téh deukeut pisan jeung jaguar, tapi rada jauh jeung citah mah. Cara anu gampang pikeun ngabédakeunana nyaéta ku nganyahokeun ti mana asalna.

Maung Tutul mah ayana ukur di Aprika jeung Asia, sedengkeun jaguar ukur di Amérika. Ciri lianna: maung tutul mah teu boga tutul dina jero kembangna, sedengkeun jaguar, lian ti kembangna leuwih badag, ogé di jerona sok aya tutulan. Nu diiwalkeun téh ukur dua: Maung Tutul Amur jeung Maung Tutul Cina Kalér, nu leuwih leutik.

Lian ti panémbongna, maung tutul jeung jaguar ogé mibanda pola paripolah nu sarupa. Jaguar bisa nyaluyukeun manéh kana rupa-rupa habitat, ti leuweung hujan nepi ka tegalan. Kitu ogé maung tutul nu bisa hirup di leuweung geledegan, tegalan, pagunungan, nepi ka sagara keusik.

Citah, najan habitatna méh sarupa jeung maung tutul, gampang pisan dibédakeunana. Maung tutul mah leuwih beurat, leuwih ngeusi, babandingan hulu jeung awakna leuwih badag, sarta tutulna mangrupa kembang, lain titik. Citah lumpatna leuwih tarik batan maung tutul, sarta hirupna leuwih condong diurnal, sedengkeun maung tutul mah sok liar peuting (nokturnal). Citah mah hirupna dina taneuh, sedengkeun maung tutul mah sok tétérékélan dina tatangkalan.

[édit] Sebaran jeung konservasi

Saméméh ayana pangaruh manusa, maung tutul téh mangrupakeun bangsa ucing nu paling sumebar di sakuliah dunya: ampir di sakuliah Aprika (iwal sagara keusik Sahara), ogé di Asia Minor. Urang masih bisa manggihan ieu sato di Tatar Arab, India, Pakistan, Cina, Sibéria, Asia Tenggara darat, sarta pulo Jawa jeung Sri Langka.

Salaku prédator badag, kahirupan maung tutul mah kaitung nyugemakeun. Dumasar panalungtikan, kiwari gé aya kira satengah juta maung tutul di sakuliah dunya. Tapi, kawas maung lianna, beuki dieu maung tutul gé beuki béakeun habitat, komo mun loba kénéh nu moro mah. Kusabab pinter nyamuni/nyaru, maung tutul kadang bisa hirup deukeut jeung padumukan manusa.