De Twède slag om Mêesn

From Wikipedia

Dit artikel es geschreevn in 't Mêesns, en da zoe best ozô bluuvn.

---

De Twède slag om Mêesn

Gedenkploate in 't Vredespark va Mêesn

De Twède Slag om Mêesn, oek gekend oender de noame "De Myneslag va Mêesn", wos e crucioal gevecht in 'n Êestn Weireldôorlog.

Inoud 1 De vôorgeschiedenisse 2 19 myn'n ontploffn 3 Grôot succes voe de Geallieerde 4 't Vervolg 5 De slag om Mêesn... of de slag om Wytschoate? 6 Bronn'n

[bewerk'n] De vôorgeschiedenisse

Tusschen 30 oktober en 3 november 1914 wos 't er ol zwoar gevochtn roend Mêesn in De Slag van 't London Scottish Regiment, oek gekend oender de noame Êeste Slag om Mêesn (dat is e bètje e bedrieglike noame, want vele gevechtn woarn eigentlik in Wytschoate). Mêesn wos ingenoomn op 1 november 1914 deur de Duutschers omda 't van strategisch belang wos. Aj mêester wos over Mêesn, koste je de hêle streke aan de west- en zuudkant min of mêer domineern: Mêesn legt op een euvel va 80 meters oge, en 'n omtrek is gemiddeld moa 45 meters oge. De Duutschers willnde eigentlik op 'n Kemmelberg geroak'n, moa da gieng nie goed. Doarom naamn ze oek Wytschoate in, da ogger lei.

[bewerk'n] 19 myn'n ontploffn

De Twède Slag om Mêesn viel op 7 juni 1917. De Britsche troepn, oender leidieng va Generaal Plumer, addn bykan 1,5 joar gegroaven an tunnels om toet oender de stelliengn van 'n Duuts te geroaken. De tunnels liep'n va Hill 60 in 't nôord'n toet in Ploegsteirt in 't zuudn.

'n Anvol wos eigentlik ol ingezet op 3 juni mè zwoarder bombardementn die anield'n toet 7 juni. Op dat moment leit d'r ol 100.000 man van 't Twède Leger van d'Iengelsche g'rêed om t'attakeern. 't Were wos kloar en de moane schoenk. Olmettekè vieln d'Iengelsche bombardementn stille. De Duutsche woarn verschrikt e begostn zelve te schietn.^[1] Twientig menuutn loater, in de vroegn uchtend (3:10 AM), brak d'elle los: 19 myn'n explodeernde, 'n êen achter 'n andern. Da wos in totoal goed voe 431.700 kilogram explosivn.^[2] De schok adde de macht van een aardbevieng. Noa 't schynt kossn ze 't voeln toet in Parys. En 'n Êestn Minister van Iengeland koste 't ôorn in Lon'n.^[3]

Van de 22 myn'n kostn de Duutsche d'r eintje elimineern in 1916. In 1955 is er nog e myne ontploft deurn 'n bleksem, gelukkiglik zoender dôodn. Dus nu is er nog ossan êen myne over die nie ontploft is. 't Bekendste restant van de Myneslag is Kroater 11 in Wytschoate, beter gekend oender de noame Pool of Peace (diameter: 76 meters). ^[4]

[bewerk'n] Grôot succes voe de Geallieerde

Gen. Herbert Plumer

Mè nundern aanvol die d'rop voogde kostn de Brittn en d'Australiërs 'n euvelkam Mêesn-Wytschoate verovern. Voerol 't Twède Leger van d'Iengelsche (negen diviesjes infanterie), oender leidieng va Plumer avaseerde rap. 'n Slag wos op 14 juni 1917 edoan. 't Dôdental wos enorm: roend de 25.000 Duutsche e 17.000 Britse soldoatn. Moa 'n moral van de Geallieerde kostte ni kapot: voe 'n êeste kêe an 't westelik froent woarn d'r mêer dôodn an de kant van de verdedigers dan an de kant van de anvallers. Achter 'n aanvol add'n de Geallieerde 7 kilometers terringwinste: in de loopgroavenôorlog va '14-'18 wos dat ol e grôot succes.

Op 10-11 april 1918 wos Mêesn were deur de Duutsche veroverd, moar op 28 september 1918 wos 't voe goed bevrid deur troep'n va Nieuw-Zêeland ^[5].

[bewerk'n] 't Vervolg

De Twède Slag om Mêesn wos e vôorloper van de Derde Slag om Ieper (beter gekend oender de noame Passchendoale).

[bewerk'n] De slag om Mêesn... of de slag om Wytschoate?

D' Iengelse klapp'n ossan over 'The Battle of Messines Ridge'. Toch zoe 't even logisch zyn vo te klapp'n van The Battle of Wytschaete (lik dan de Duutschers oek mêestol schryvn ov'r der Schlacht am Wytschaete-Bogen) omda Wytschoate in 't midd'n van de zak ligt dan ze met de slag veroverd en. 't Probleem vo d'Iengelsche wos da by Witschoate 't 16ste Ierse Divisieregiment lag - e katholiek Iers regiment. D'Iengelsche zagen da ni zittn dan die Ieren me d'êre zoen goan lopen. Dodeure kozen ze vo 'De slag om Mêesn' voe benoamienge, en dat is ton ook overgepakt deur de Nederlandstoalige geschiedenisseschryvers.

[bewerk'n] Bronn'n

1. ↑ www.diggerhistory.info, URL bekeek'n op 21/01/2007
2. ↑ www.webmatters.net, The total weight of explosives used amounts to 431,700 kilos - URL bekeek'n op 06/01/2007
3. ↑ www.firstworldwar.com , Audible in Dublin and by Lloyd George in his Downing Street study, the combined sound of the simultaneous mine explosions comprised the loudest man-made explosion until that point - URL bekeek'n op 06/01/2007
4. ↑ www.wo1.be, URL bekeek'n op 06/01/2007
5. ↑ http://ww1cemeteries.com, URL bekeek'n op 09/01/2007