Australia

De Biquipedia

Mancomunidá d'Australia

(En detalle) (En detalle)
Luenga Ofizial	Anglés
Capital  - Poblazión:	Camberra 339.000 (2000)
Reina	Isabel II
Primer Ministro	John Howard
Aria	7.686.850 km²
Poblazión  - Total:  - Densidá:	20.180.878 (2003) 2 ab./km²
Independenzia	D'o Reino Unito 1901, 1939, 1986
Moneda	Dólar australiano (AUD)
Zona oraria	UTC+8, +10
Inno Nazional	Advance Australia Fair
Internet TLD	.au

Australia ye un país d'Ozeanía. A suya capital ye Camberra. A Mancomunidá d'Australia (Commonwealth of Australia) ye a siesena nazión de o mundo en amplaria, a unica que ocupa tot un continén e a mayor nazión d'Australasia. Postato que ye una isla, no ha mugas dan atras nazions. Os bizins més amán son Nueba Zelanda enta o sur e Papúa-Nueba Guinea, Timor Oriental e Indonesia enta o norte. O nome d'Australia probién de a frase latina terra australis incognita que significa "tierra de o sur esconoxita".

Contenius 1 Istoria 2 Estatos e territorios 3 Politica 4 Cheografía 5 Fauna e flora 6 Economía 7 Populazión 8 Cultura

[Editar] Istoria

Australia leba abitata dende fa 42.000 dica 48.000 añadas, cuan os abampasatos de os aboríxens autralians bi arribón de o sureste d'Asia. A tierra no estió escubilata per os Europeus dica o sieglo XVII, cuan estió dibisata e bisitata per cuatro espedizions. Dos terzios orientals de o continén reclamó o Reino Unito enta 1770 e os primers colonos fundón en Nueba Gales de o Sur una colonia penal britanica o 26 de chinero de 1788. Os atros territorios estión reclamatos per o Reino Unito en 1829. A mayor parti de os estatos, que més tardi se chunión ta formar Australia, no yeran colonias penals. O 1 de chinero de 1901 a Mancomunidá d'Australia naxió, como dominio de o Imperio Britanico. Dende allora Australia estió independién, encara que o zaguer binclo legal con o Reino Unito no se crebó dica 1986. Australia ye una monarquía constituzional, con Isabel II d'Angliterra reinando como Reina d'Australia. En 1999 se fazió un referendo ta camiar a Constituzión e combertir Australia en republica, con un presidén triato que á la reina sustituyese como chefa d'estato, pero se refusón istas reformas.

[Editar] Estatos e territorios

Australia se trestalla en sies estatos e dibersos territorios. Os estatos son:

• Australia de o Sur (SA)
• Australia de l'Ueste (WA)
• Nueba Gales de o Sur (NSW)
• Tierra de a Reina (Anglés; Queensland)(QLD)
• Tasmania (TAS)
• Bitoria (VIC)

Os territorios son:

• Territorio de a Capital d'Australia (ACT)
• Territorio de o Norte (NT)

Australia n'ha de lumerosos territorios minors como o Territorio de a Baía de Jervis, en Nueba Gales de o Sur, administrato como base nabal e puerto maritimo de a capital. Dibersos territorios esternos son abitatos:

• Isla de Cocos (NW)
• Isla Norfolk (E.)
• Isla de Nadal (S)

Asabelos de territorios son cuasi disiertos:

• Isla de o Mar de Coral
• Islas McDonald e Heard
• Isla Ashmore e Cartier
• Territorio Australián Antartico

O Territorio de a Capital d'Australia estió creato en o puesto triato ta la capital Camberra. Camberra estió fundata como compromís entre as dos zidaz prinzipals, Melburna e Sidnei. Atras zidaz importans en Australia son Alice Springs, Cairns e Brisbana (en a costa oriental), Darwin (en a costa septentrional), Perth (en a costa ozidental) e Adelaida (en a costa meridional). O 85% de a populazión australiana reside en as zidaz. Ye miembro de lumerosos organismos internazionals como a Organizazión de Nazions Unitas, a Cooperazión Economica Asiatico-pazifica e a Mancomunidá Britanica.

[Editar] Politica

A Mancomunidá d'Australia ye una monarquía constituzional: A Reina d'Australia ye a chefa ofizial de o Estato e ye representata per un Gubernador Cheneral. Prauticamén, a funzión de a Corona (e per tanto de o Gubernador Cheneral) ye pro zerimonial. O poder executibo, en teoría representato per a Corona, ye exerzito per un gabinet menato per o primer ministro. O primer ministro tamién gosa estar o chefe de o partito dan mayoría en a Cambra de Representans, Cambra Baxa (dan 150 escaños) d'un parlamento bicameral. A Cambra Alta (76 escaños) ye o Senato, en a cuala cada estato ye representato per doze senadors, independienmén de os abitans u os territorios que tienga cada estato. Cada tres añadas se zelebran elezions, cheneralmén con a metá de o Senato triable ta la reelezíons.

[Editar] Cheografía

A mayor parti de o territorio australián son disiertos deserticos u semideserticos. O 40% de a superfizie ye cubilata per dunas d'arena. Només que os cantos surozidental e suroriental han un clima temperato e espleitan un terrén moderatamén fértil. A parti norte de o estato ha un clima tropical. L'Arrezife de a Gran Barrera (Anglés; Great Barrier Reef), de inchén amplaria, ye a mayor barrera de coral de o mundo e chaze amán de a costa noreste. L'Urulu u a Peña d'Ayers, en Australia zentral, ye o mayor monolito de o mundo. Iste estato comprende o 90% d'Ozeanía. Tamién Australia poseye a isla de Tasmania, de a cuala la separta o Estreito de Bass. Australia se puede subdibidir en tres rechions: o canto oriental do son os Alpes australians e a gran catena trestalladera, l'ozidén do bi'n ha de mesetas e bellas zonas deserticas, e o zentro do ye l'Ibón Eire, o més gran. En o territorio desertico bels animals tipicos australians biben, como o canguro, o diaple de Tasmania, o dingo, o cuala, e o emú. O paisache australián presenta cuatro menas de bechetazión: l'arbusto composato per eucaliptos d'alters dica 40 m, o malee formato per eucaliptos no més alters de zinco metros, a mulga ye composata de plandas acazias, á la fin o mon baxo formato de barzas chicotas. O fuso orario de o continén baría de UTC+8 dica UTC+10. Cualques islas plegan ta UTC+6'5 e UTC+11. Australia fa muga á o sur dan Ozián Indico, á o norte con o Mar d'Arafura, á noreste dan o Mar de Coral, á o noreste con o Mar de Timor, á o sureste con o Mar de Tasman e á o sur con l'Ozeán Indico.

[Editar] Fauna e flora

Encara que siga una isla desertica e semiarida, en Australia no'n mancan d'abítaz dibersicatos ta acullir-bi-ne d'espezies animals e bexetals. Per a gran edá de o continén, os climas tan bariables seguntes as estazions e o aislamiento cheografico largismo, han puesto esembolicar-sen-bi una fauna e flora peculiars. As espezies animals més conoxitas son: a foca, o cuala, o emú, l'ornitorrinco, o guombat e o equidna, que tanto ficazio clamón ta os primers esploradors europeus. Manimenos caballos, güellas, bacas bi estión importatos d'o continén europeu rezienmén. Australia poseye dos millons de capezas de ganato obín.

[Editar] Economía

Australia ye una economía prospera de mena ozidental, dan una renda per cápita á ran de as cuatro economías europeyas. En as zagueras añadas Australia ha concarato una crisis dan un creximiento zereño. A crexién produzión en a economía domestica frenó as perdas, e a confitanza de as interpresas e consumidors romanió fuerte. O enfasis australián ta as reformas ye estato atro de os elementos de a suya fuerza economica.

[Editar] Populazión

Cuasi toz os australians han orixen en os inmigrans de os sieglos XIX e XX, prinzipalmén de o Reino Unito e Irlanda, e dimpuesas tamién d'atras nazions, sopretot d'Italia, Grezia e més rezienmén de nazions asiaticas. Os deszendiens de os abitans orixinals, os aboríxens australians, constituyen o 2'2% de a populazión (seguntes o zenso de 2001). Como atras nazions esembolicatas, a populazión australiana embellexe, dan més de pensionistas que de presonas en edá laboral. En Australia se charra anglés, encara que cualques comunidaz aboríxens han alzata lurs luengas, e un lumero pro gran de inmigrans de primera e secunda chenerazión ye bilingüe. Tres de cada cuatro australians se declaran cristians, prinzipalmén catolicos u anglicans. Tamién se prautican atras relixions.

[Editar] Cultura

Festibidaz

Calendata	Nome
1 de chinero	Fin d'año
26 de chinero	Fiesta nazional
Pascua	Biernes santo
Pascua	Sabato de Pascua (fueras de Bitoria e Australia Ozidental)
Pascua	Lunes de Pascua
25 d'abril	Día d'ANZAC
Primer lunes dimpuesas d'o 9 de chunio	Cumpleañadas d'a Reina (fueras d'Australia Ozidental)
25 d'abiento	Natal
26 d'abiento	San Esteban (fueras d'Australia Meridional)

Se beigan as imachens de Commons sobre Australia.

Países d'Ozeanía
Australia | Fiyi | Islas Marshall | Estatos Federatos de Micronesia | Kiribati | Nauru | Nueba Zelanda | Timor Oriental | Tonga | Tuvalu | Palau | Papua y Nueba Guinea | Islas Salomón | Samoa | Vanuatu
Dependenzias: Islas Cook | Guam | Hawai | Irian Jaya | Islas Maluku | Isla Norfolk | Islas Marianas d'o Norte | Niue | Nueba Caledonia | Isla de Pascua | Polinesia Franzesa | Islas Pitcairn | Samoa Americana | Tokelau | Wallis y Futuna