Teunolochía
De Biquipedia
A parabra teunolochía data d'o sieglo XVIII, cuan a teunica, istoricamén empírica, empezipia a bincular-se con a zenzia y s'empezipian a sistematizar os metodos de produzión. A teunolochía surte al enfocar determinatos problemas teunicos sozials con una conzeuzión zentifica y dentro d'una zierta bastida economica y soziocultural; ye intimamén binculada con a zenzia y a complementariedá entre as dos se incrementa cada begada más. A teunolochía emplega o metodo zentifico, repleca o saber sistematizato y en o suyo aizionar se manulla tanto a ran prautico como conzeutual, ye dizir, que albarca lo fer y a suya reflesión tiorica. A teunolochía ye o conchunto ordenato de conoximientos y os correspondiens enantos que tienen como oxetibo la produzión de cabals y serbizios, abendo en cuenta la teunica, a zenzia y os aspeutos economicos, sozials y culturals embrecatos. L'aduba d'o termín se extendilla a los produtos resultáns d'ixos enantos que deben responder a nezesidás u deseyos d'a soziedá y tener como proposito contrebuyir a amillorar a calidá de bida. Cuan a teunolochía busca una soluzión a los problemas que se emplantillan en a soziedá, lo fa relazionando a teunica (os suyos conoximientos, trastes y capazidá imbentiba), con a zenzia (o campo d'os conoximientos zentificos) y con o tarabidau economico y soziocultural d'o meyo (as relazions sozials, as formas organizatibas, os modos de produzión, os aspeutos economicos, a bastida cultural, entre atros aspeutos). Resumiendo, se puede dizir que la zenzia ye ligada a lo deseyo de l'ombre de conoxer, mientres que la teunica y a teunolochía lo son a la boluntá de l'ombre de fer, ta satisfer os suyos deseyos y nezesidaz.
