Kalle Kniivilä
El Vikipedio
Kalle KNIIVILÄ estas finna esperantisto loĝanta en Svedio. Li naskiĝis en 1965 en Joensuu, orienta Finnlando. Li loĝas en suda Svedio kie li ekde 1997 laboras kiel ĵurnalisto ĉe la plej granda gazeto de la urbo Malmö, Sydsvenska Dagbladet. Pli frue li laboris kiel ĵurnalisto ĉe la finna gazeto Kansan Uutiset en Finnlando kaj en Sovetio/Rusio.
Esperanton li eklernis en 1982. Dum la jaroj 1993-1997 li redaktis la oficialan gazeton de TEJO, TEJO Tutmonde. En 1995 li membris en la Loka Kongresa Komitato de la 80-a Universala Kongreso de Esperanto en Tampereo kaj tie respondecis pri informado. En la jaroj 1997/1998 li estis komisiito pri informado ĉe UEA, kaj en 1998–2000 li estis estrarano de UEA pri informado. Ekde printempo 2003 li redaktas la retan bultenon Libera Folio, kiun li fondis kune kun István Ertl.
