Amsterdam
From Wikipedy
Amsterdam is de haadstêd fan Nederlân.
Amsterdam is yn Nederlân de stêd mei it grutste oantal ynwenners (738.763 op 1 jannewaris 2004). Yn tsjinstelling ta in soad oare lannen is de residinsje net yn de haadstêd festige. Faak wurdt der dêrom fan in kulturele haadstêd sprutsen, al is Amsterdam ek de twadde seehaven fan Nederlân, en hawwe in protte wichtige bedriuwen yn Amsterdam harren haadfestigings. Fierders hat Amsterdam in tige florissante toerismesektor.
[bewurkje seksje] Stêdsoansicht
Wat fuortendalik opfalt oan'e Amsterdamske binnenstêd, ek yn in lân mei sa folle wetter as Nederlân, binne de grêften. Neist de Amstel, dêr't de stêd syn namme fan hat, en it IJ, de twa wetterweien fan natuerlike oarsprong fan'e stêd, binne dat yn it foarste plak de Hearegrêft, de Keizersgrêft en de Prinsegrêft, dy't as trije ringen om de âlde binnenstêd lizze. Lytsere grêften ferbine de ringgrêften mei elkoar, en mei de grêften út de âlde binnenstêd. En oan al dy grêften stean dan de grêftehûzen.
[bewurkje seksje] Wichtige plakken en gebouwen
Miskien it bekendste plak fan Nederlân is de Dam, mei it Keninklik Paleis, de Nije Tsjerke, it Museum Madame Tussaud en it Nasjonaal Monumint op de Dam, foar de fallenen út de Twadde Wrâldkriich. Oare wichtige gebouwen binne, wat de tjerken oanbelanget, de Westertsjerke (mei de bekinde Westertoer), de Moses- en Aärontsjerke en de Sint-Nikolaastsjerke. Wat oare gebouwen oanbelanget binne in soad âlde en nije(re) gebouwen it neamen wurdich, lykas de Beurs fan Berlage en it Sintraal Stasjon. Yn Amsterdam-Súdeast, ek as Bijlmermar bekend, binne de lêste tsien jieren in pear opfallende gebouwen delsetten, wêrûnder de Amsterdam Arena, 't stadion fan fuotbalklub Ajax.
