Ártico
Na Galipedia, a wikipedia en galego.
O Ártico é a rexión que rodea o Polo Norte da Terra. Inclúe partes de Canadá, Groenlandia (que é un territorio dinamarqués, Noruega, Suecia e Finlandia, asi como o Océano Ártico.
Existen numerosas definicións da rexión ártica. Considérase xeralmente que o seu limite está ao norte do Círculo Polar Ártico (66° 33’N), que é o limite do sol de medianoite e a noite polar. Outras definicións baséanse no clima e a ecoloxía, como a isoterma 10°C de xullo, que tamén corresponde aproximadamente coa liña de árbores na maior parte do Ártico. Socialmente e politicamente, a rexión ártica inclúe os territorios septentrionais de oito estados, incluindo Laponia, ainda que, segundo as definicións científicas, moito deste territorio é realmente subártico.
O Ártico é fundamentalmente un oceano recoberto de xelo e rodeado de terra xelada e desprovista de árbores. A vida é abondosa e inclúe organismos que viven no xelo, peixes e mamíferos mariños, páxaros, animais terrestres e comunidades humanas.
A rexión ártica é, pola súa natureza, unha área única. As culturas da rexión e os pobos indíxenas do ártico téñense adaptado ás súas condicións frías extremas. Ten un papel relevante no equilibrio físico, químico e biolóxico do mundo. Reacciona sensibelmente ás mudanzas no clima, que repercuten de volta na situación global do ambiente. Desde a perspectiva da investigación na mudanza climática, a rexión ártica considérase un sistema de aviso temperán.
O nome provén do grego antigo αρκτος, arcthos, "oso", en referencia á constelacións da Osa Maior á que pertence a Estrela Polar.
