Pol Pot
Na Galipedia, a wikipedia en galego.
Saloth Sar (19 de maio de 1925 - 15 de abril de 1998), coñecido comoPol Pot, foi un dirixente da guerrilla comunista dos Khmers Vermellos, impuxo un réxime totalitario en Camboia de 1975 a 1979. O seu goberno comunista pro-chinés é un dos exemplos máis claros de ditadura brutal e totalitaria no século XX, responsable do xenocidio camboiano. Forzou á evacuación en masa das cidades e matou ou desprazou a millóns de persoas deixando no seu país un triste legado de violencia e pobreza.
[editar] Biografía
Tras participar na resistencia anti-francesa, marchou a París a estudar en 1949 e alí afiliouse ao Partido Comunista e tomou contacto con outros nacionalistas camboianos. Tras fracasar nos seus estudos volveu a Phnom Penh en 1953.
Colaborou na fundación do Partido Comunista Camboiano en 1960, fundou as guerrillas do Khmer Vermello que loitaron contra o goberno de Norodom Sihanouk e do xeneral Lon Nol, a quen finalmente derrocaron en 1975.
Ata 1979 estableceu unha brutal ditadura durante a que se calcula que polo menos un millón de persoas morreron por traballo forzado, fame, tortura, enfermidade ou execucións. Todo nun intento de abordar unha reforma social e agraria radical que propiciou o desprazamento da poboación urbana ao campo.
En 1979 unha invasión do Vietnam prosoviético derrotouno e refuxiouse nas montañas continuando á fronte da guerrilla Khmer. Foi perdendo aos poucos importancia e a finais dos noventa achábase en franca decadencia. Deposto polos seus compañeiros foi detido por eles en 1997. Morreu por causa natural en 1998 cando aínda seguía baixo arresto dos seus antigos compañeiros de loita.
