Cavallo

De Wikipedia, le encyclopedia libere

Systematica: Phylo: Chordatos, Classe Mammales, Ordine: Perissodactylos Familia: Equidas Genere: Equus

Le familia Equidas contine septe species: 3 zebras, 2 asinos e 2 cavallos. Le duo cavallos es le cavallo salvage asian (Equus przewalskii) e le cavallo domesticate (Equus caballus).

Previemente se supponeva que le cavallo domesticate descende del cavallo salvage (Equus przewalskii) mais secundo un articulo in "New Scientist" (2003-12-06), scientistas del universitate in Vienna pro studios genetic ha demonstrate que iste species se ha divergite ante plus de 120.000 annos. Le cavallo domesticate solmente ha existite durante 6.000 annos.

Le cavallo e le asino es tanto affin que illos pote obtener proles appellate mulos o mulas dependente del sexo. Si le matre es un cavallo le prole essera plus grande e plus simile a un cavallo mais le aures simila le aures longe del asino. Si le matre es un asino le prole essera minor mais le capite simila un cavallo. In plure linguas il ha nomines differente pro iste animales. In ambe casos le proles essera sterile pois que le cavallo ha 64 chromosomas e le asino 62. Per consequente le proles habera 63, lo que impedi reproduction.

Il es equalmente possibile hybridar zebras e cavallas o asinos feminin mais iste proles non ha devenite usabile.

Le unic cavallo salvage es hodie

• Le cavallo salvage asian (Equus przewalskii). Illo quasi esseva extinguite in le natura, sur le steppas de Mongolia, ma ha se recuperate in parcos zoologic, e ha recentemente essite reconducite al natura.

Olim existeva anque tres altere cavallos salvage; le tarpan, le cavallo steppic arctic e le cavallo silvatic.

• Le tarpan (Equus caballus gmelini) viveva in Polonia usque al dece-none seculo quando illo esseva extinguite. On ha essayate reingenerar lo e hodie il ha tal cavallos ma illos naturalmente non es ver tarpanes.
• Le cavallo steppic arctic viveva olim in Sibiria e hodie il ha un cavallo domesticate, le vacutponny, que forsan es affin a illo.
• Le cavallo silvatic esseva un grande cavallo pesante in le nord de Europa, e previe on supponeva que nostre moderne cavallos de sanguine frigide descendeva de illo.

In plure areas del mundo il ha cavallos que ha devenite salvage ma illos descende de cavallos domesticate. Un tal cavallo es le mustang american que descende de cavallos del conquistadores espanol. Antea il non habeva cavallos sur le continentes american ma on crede que le cavallo original, Eohippus, viveva in America. Illo esseva tanto parve como un cane.

• Le cavallo domesticate (Equus caballus) esseva domesticate ante 6.000—10.000 annos e ha desde alora essite usate como animal de tracto o animal de sella ma anque como nutrimento. Dependente del uso e su exigentias on ha ingenerate multe racias con colores differente e con plure typos de stato corporal. Le scientistas non ha essite de accordo si omne racias proveni de un singule o plure ancestres. Recercas per professor Hans Ellegren et al., Svedia, publicate in le revista Nature Genetics 2004, ha demonstrate que un parte del chromosome Y es le mesme in omne racias, grande e parve. Le conclusion esseva que omne cavallos domesticate proveni de un singule stallon. Del mesme maniera on ha trovate que il ha al minus un centena de ancestres feminin. Dunque il es probabile que le homine de bon hora discoperiva que il es plus importante ingenerar stallones apte. Le causa de isto naturalmente es que stallones pote lasser multo plus pullos durante su vita que un cavalla, lo que anque hodie dirige le elevamento. Le altor e le peso del cavallo pote variar ab 0,5m/14kg (Falabella) usque a 1,95m/1400kg (Percheron). Le limite pro esser registrate in le organisation de cavallos miniatura es 0,86 m.

[modificar] Vocabulario referente a cavallos

• Cavallo — cavallo con un altitude final al minus 148 cm.
• Pony — cavallo con un altitude final minus que 148 cm
• Cavalla — cavallo feminin
• Stallon — cavallo masculin
• Colt — stallon non sexualmente matur (minus que circa 24 menses)
• Pullo — cavallo nascite durante le anno presente
• Cavallo castrate — stallon castrate
• Cavallo de pur sanguine, arabe o anglese
• Cavallo de sanguine calide
• Cavallo de sanguine frigide
• Cavallo de sella — cavallo pro cavalcada
• Trottator — cavallo pro cursas de trotto
• Galopator — cavallo pro cursas de galopa
• Cavallo ambulator — gamba anterior e posterior del mesme latere es movite paralellmente
• Passo de cavallos islandese
• Ferro de cavallo — guarnitura metallic del ungula