Sigmund Johanson Baldvinsen
Úr Wikipediu, frjálsa alfræðiritinu
Sigmund Johanson Baldvinsen er skopmyndateiknari og uppfinningamaður í Vestmannaeyjum. Sigmund fæddist í Noregi og kom til Íslands þriggja ára gamall. Faðir hans er íslenskur og móðir hans er norsk. Sigmund ólst upp á Akureyri en fluttist svo til Vestmannaeyja. Hann er kvæntur Helgu Ólafsdóttur en hún er ættuð úr Vestmannaeyjum.
Efnisyfirlit |
[breyta] Skopmyndateiknari
Fyrstu teikningar Sigmunds í blöðum eru frá árinu 1960 eða 1961 en þá gerði hann forsíður fyrir Vikuna og Fálkann. Sigmund er þekktastur fyrir skopmyndir sínar í Morgunblaðinu. Fyrsta mynd hans í Morgunblaðinu tengdist Surtsey og fyrstu landgöngu þar. Hún birtist í Morgunblaðinu 25. febrúar 1964.
Skopmyndateikningar voru í fyrstu aukavinna Sigmunds með starfi við verkstjórn í frystihúsum í Vestmannaeyjum en í Heimaeyjargosinu árið 1973 varð Sigmund fastráðinn við Morgunblaðið og hefur skopmyndateiknun verið aðalstarf hans frá þeim tíma.
[breyta] Uppfinningamaður
Sigmund er uppfinningamaður. Hann er vélstjóri að mennt. Sigmund hefur hannað fiskvinnsluvélar og hann fann upp sjálfvirkan sleppibúnað gúmbjörgunarbáta.
[breyta] Málaferli
Sigmund hefur lent í málaferlum út af myndum sínum. Þýskur leynilögreglumaður var fenginn til landsins til að vinna að lausn Geirfinnsmálsins og Sigmund teiknaði skopmynd þar sem sást SS merki á búningi leynilögreglumannsins. Ritstjórar Morgunblaðsins voru dæmdir en Sigmund slapp við dóm því það vantaði eftirnafn hans við skopmyndina.
[breyta] Íslenska ríkið kaupir skopmyndir
Þann 15. desember 2004 keypti íslenska ríkið 10 þúsund teikningar eftir Sigmund og hyggst gera þær aðgengilegar á Netinu.
[breyta] Heimild
- Spegilmyndir samtímans. Skoðað 28. febrúar, 2006. Grein í Morgunblaðinu 16. desember, 2004
