E Vicipaedia
Achilles (-is, m.) erat filius Thetidis et Pelei, et pater Pyrrhi. Chironi centauro educandus traditus est. Inter filias Lycomedis regis Scyri a matre, ne ad bellum Troianum ire cogeretur, sub habitu muliebri absconditus est, ubi ex Deidamia generavit Neoptolemum. Ab Ulixe habitu mercatoris detectus ad bellum Troianum ductus est. Erat optimus et maximus miles totius Graecorum exercitus. Occidit Hectorem fortissimum Troianorum eiusque cadaver ter circum moenia Ilii traxit bigis alligatum. Patroclum enim ulcisci voluit sibi amicissimum, qui ab Hectore interfectus esset. Dissensit ab Agamemnone odio implacabili, quod sibi Briseidem eripuisset. Captus est amore Polyxenae tempore indutiarum. Invitatus per fraudem specie nuptiarum in templum Apollinis a Paride sagitta in calcaneo transfixus, ubi tantummodo vulnerabilis erat, interfectus est.
