Jacques Santer
Vu Wikipedia, der fräier Enzyklopedie.
De Jacques Santer gebuer den 18. Mee 1937 zu Waasserbëlleg, ass e lëtzebuergesche Politiker.
No senger Première am Atheneum geet de Jacques Santer fir ee Joer op de Cours Supérieur an dono op d'Universitéite vu Stroossbuerg a Paräis, wou en Droit an Economie studéiert.
Séng berufflech Carrière fänkt en als Affekot un. 1962 gëtt en Attaché am Ministère vun der Sécurité Sociale.
Tëschent 1966 an 1972 ass e Fraktiounssekretär vun der CSV. 1972 gëtt e Staatssekretär fir Sozial- a Kulturpolitik an der Regierung Werner-Schaus II.
1974 gëtt de Jacques Santer Deputéierten am Europäesche Parlament, wouvunner en tëscht 1975 an 1977 Vizepresident ass.
1979 gëtt de Jacques Santer President vun der CSV. No de Wahlen 1979 gëtt e Finanzminister a Minister fir Aarbecht a Soziales an der Regierung Werner-Thorn-Flesch.
De Pierre Werner zitt sech 1984 aus dem politesche Liewen zeréck. Dat erméiglecht dem Jacques Santer, dee Spëtzekandidat vu senger Partei ass, Premierminister vun enger Koalitiounsregeirung mat der LSAP ze ginn. Des Koalitiounsregierung, mam Santer un der Spëtzt, gëtt 1989 an 1994 vun de Wieler confirméiert.
De Jacques Santer ass och vun 1984 bis 1989 President vun der Weltbank a vun 1991 bis 1994 Gouverneur vum Internationale Währungsfonds.
1995 gëtt de Jacques Santer vum Europäesche Conseil zum President vun der Europäescher Commissioun ernannt; hien trëtt des Funktioun am Januar 1996 un. E Rapport, deen d'Responsabilitéit vun der Commissioun bei der Bekämpfung vu Bedrugsfäll a Fro gestallt huet, huet de 15. Mäerz 1999 derzou gefouert, dass d'Commissioun huet missen zerécktrieden.
Vun 1999 bis 2004 ass de Jacques Santer Deputéierten vum Europäesche Parlament a vun 2002 bis 2004 ee vun de Lëtzebuerger Memberë vun der Europäescher Conventioun.
Zënter 1998 ass de Jacques Santer President vum Verwaltungsrot vun der Fondation Musée d'Art Moderne Grand-Duc Jean. Am Summer 2004 gëtt e President vum Verwaltungsrot, an am Dezember 2004 Member vum Direktiounscomité vum RTL Group.
De Jacques Santer ass bestued a Papp vun zwee erwuessene Jongen.
