Leyenda d'o toro e la estrela
De Biquipedia
A leyenda d'o toro e la estrela ye lo mito fundazional de la ziudat de Tergüel.
Los mitos fundazionals con animals se troban en tota Europa. Consisten en que una presona u una colla de presonas ban seguindo á un animal dica un puesto on lo cazan u lis cuaca, se i quedan e i fundan un nuclio de poblazión u un país nuebo. Los ongaros seguioron á un zierbo, los polacos á una alica, los alcañizanos á una lupa, los moldabos a un toro, lo mesmo que los tergüelanos.
Una bersión cuenta que en lo sieglo XII, cuan la Reconquista tergüelana, lo rei Alifonso lo Casto prenió bels lugars e seguindo por la ribera de lo Martín, plegó ta lo que güei ye Tergüel. Dimpués se'n fue con lo suyo exerzito pa luitar contra los rebeldes de las montañas de Prades, quedando una resta de guerrers con la orden d'estar á la defensiba. Seguntes se diz los guerrers no obedexioron e siguioron á un toro salbache á lo que iba seguindo una estrela dende lo firmamento, car lo eban bisto en suenios premonitorios. Yera un siñal que seguntes ellos marcaba lo puesto on establir una nueba poblazión. Prenioron la fortaleza de Tergüel e se i quedoron.
Atra bersión diz que los abitadors de la zona salioron dezaga un toro salbache que recorreba la redolada e que una nueit s'aturo en un puesto baxo una estrela e comenzo á soltar gramitos. Prenioron como güenas las siñals de lo zielo e la tierra lis presentaban e dezidioron costruir-ie una nueba billa.
Con esta leyenda tamién se preba d'esplicar la etimolochía de Tergüel. Prenioron de lo Toro tres letras, TOR, e de la estrela clamata Actuel, atras tres, UEL. Estas seis letras chuntas formaban lo nome de TORUEL, e dimpués salió lo nome de Tergüel.
En una bersión de las Cronicas de los Chudezes de Tergüel copiata en o sieglo XVII, més castellanizata que atras bersions, e que ye en l'archibo istorico probinzial de Tergüel, podemos leyer esto:
- Et los adalides et los más sabidores de tal fecho subieron a la muela et allí de es agora la plaça, de mañana en el alva, trobaron un bel toro et andava una bella estrella sobre el. Et luego que los vido el toro començo a bramar et dixeron los adalides que aquí avian buenas señales por fer la población do aquel toro tomaron senial. Et por eso fazen en la seña toro y estrella. Et aun de aquel encuentro mismo tomaron noche por la villa et tomaron del toro tres letras: t o r. Et dizen los sabidores que la estrella nombre Actuel et tomaron del nombre de la estrella otras tres letras: u e l. Et todas estas seis letras ayuntadas en uno fazen part et dizen Toruel. Et por eso pusieron tal nombre a la villa et desi comenzaron a poblar esta villa en esta muela que es dicha Toruel.
Se recuerda este mito en o escuto de Tergüel y en lo simbolo de la ziudat, lo Torico.
