Элĕк халăх театрĕ

Википедири материал

Элĕкри халăх театăрĕ — Чăваш Енĕн Элĕк районĕнчи театăрĕ, Элĕк салинчи культура керменĕнче вырнаçнă.

[тӳрлет] Истори

1933 çулта Элĕк салинче вулав çурчĕ уçăлнă. Унта Синерте пурăнакан Василий Илларионович Волков ĕçлеме пуçланă. Вăл ял халăхĕн культурине ӳстерессишĕн чун-чĕререн тăрăшакан çамрăк пулнă. Тăрăшни сая кайман — çынсем культура вучахне йышлăн çӳреме тытăннă. 1934 çулта В. И. Волков пĕрремĕш хут драма кĕтесне (кружокне) йĕркелесе янă, çавăнтан пуçланнă ĕнтĕ Элĕкре спектакăльсем лартса кăтартасси.

1967 çулта А. Эсхель çырнă "Виçĕ туй" камита сценă çинче пултаруллă кăтартаççĕ. Ку спектакăле Константин Волков баянист юрă-çемĕпе лайăх илемлетсе анлăлатать. Тĕп ролĕсене ун чухне Вениамин Золотов, Альбина Орехова, Елена Храброва, Геннадий Михайлов тата ыттисем чăн-чăн артисчĕсем пекех сăнарласа параççĕ. Ку кăтартăва пăхма ятарласах Шупашкартан килеççĕ, вара драма ушкăнне "Халăх театăрĕ" ятне тивĕçтерме сĕнеççĕ.

Элĕкри халăх театăрĕн пĕрремĕш ĕçĕ — çармăс драматургĕ А. Волков çырнă "Туй икерчи" камит тăрăх ӳнерленĕ спектакăль. Унăн премьери 1968 çулта, чӳк, 20 пулса иртнĕ. Театăрăн çак пĕрремĕш ĕçĕнче В. Л. Тихонова (малтанхи хушамачĕ Золотова), Л. Г. Герасимова, А. Г. Григорьев, А. А. Янович, М. М. Михайлов, Д. И. Илларионов, З. М. Винцова, А. Г. Гурьева хăйсен пултарулăхне кăтартнă. Спектакăле Д. Илларионов лартнă, ӳнерçи П. Александров пулнă, кĕввине К. Волков йĕркеленĕ. Спектакăле пĕтĕмпе 20 хутчен выляса кăтартнă.

1990 çулта халăх театăрĕ вунă кунлăха Пушкăртăстана гастроле каять. Унта театăр Пĕтĕм Раççейри фестивальне хутшăнать, çĕнĕрен хатĕрленĕ "Виçĕ туй" кĕвĕллĕ камита кăтартать. 1992 çулта театăр ушкăнĕ "Юрату — хăпарту мар" мыскарана сцена çинче кăтартать, çак ĕçпех республикăри халăх театăрĕсен фестивальне хутшăнать. Спектакăле икĕ хутчен Чăваш телекуравĕпе кăтартаççĕ.

[тӳрлет] Театăрăн хисепĕсем

• В. И. Ленин çуралнăранпа 100 çул çитнĕ ятпа ирттернĕ республика фестивалĕн 1-мĕш степĕнлĕ Дипломĕ — 1970.
• СССР тултарнăранпа 50 çул çитнĕ ятпа ялсенчи ӳнерлĕ пултарулăх ушкăнĕсен республикари кăтартăвĕн Дипломĕ — 1972.
• Халăхăн ӳнерлĕ пултарулăхĕн Пĕтĕм Союзри 1-мĕш фестивалĕн II степĕнлĕ Дипломĕ — 1976.
• Аслă Çĕнтерӳ 40 çул тултарнă ятпа ирттернĕ халăх пултарулăхĕн Пĕтем Союзри кăтартăвĕнче СССР çыравçисен Пĕрлĕхен секретариачĕн Дипломĕ — 1987.
• Асла Октябрь 60 çул тултарнă ятпа ирттернĕ халăх пултарулăхĕн республикăри фестивалĕн лауреат Дипломĕ — 1987.

[тӳрлет] Вуламалли

• Л. И. Ефимов, "Элĕк Енĕ", Элĕк, 1994.