Триаголник

Триаголникот е една од основните фигури во геометрија: многуаголник со 3 темиња и 3 страни кои се прави линиски сегменти.

Кои било 3 неколинеарни точки одредуваат триаголник и единствена рамнина, т.е. дводимензионален Декартов простор во Евклидската геометрија.

[уреди] Видови триаголници

Триаголниците може да ги поделиме според должините на нивните страни:

Во Рамностран триаголник, сите страни се еднакви по должина. Во него сите внатрешни агли се еднакви—имено, секој од нив има по 60°. Рамностраниот триаголник е всушност правилен многуаголник.
Во Рамнокрак триаголник најмалку две страни се со еднаква должина. Рамнокракиот триаголник има два еднакви внатрешни агли (имено, аглите каде секоја од еднаквите страни се спојува со третата страна). Рамностраниот триаголник е исто така и рамнокрак триаголник, но не сите рамнокраки триаголници се рамнострани.
Во Разностран триаголник сите страни имаат различни должини. Внатрешните агли во разностран триаголник се сите различни.


Рамностран	Рамнокрак	Разностран

Триаголниците можат да бидат класифицирани и според големината на нивниот најголем внатрешен агол, опишано подолу со користење на степени.

Правоаголен триаголник има еден внатрешен агол од 90° (прав агол). Страната спроти правиот агол се нарекува хипотенуза; тоа е најдолгата страна во правоаголниот триаголник. Другите две страни се викаат катети.
Тапоаголен триаголник има еден внатрешен агол поголем од 90° (таквиот агол се нарекува тап агол).
Остроаголен триаголник има внатрешни агли кои се помали од 90° (три остри агли).


Правоаголен	Тапоаголен	Остроаголен