Kamell
From Wikipedia
De Kamellen un Hundskamellen (Matricaria) billt en Geslecht ut de Familje vun de Korfblöters. All sünd se to finnen up Ackerland, up wööste Plätz un an Wegränner, wo se sik faken so stark vermehrt, dat se dar towielen dichte Teppichen billt. Blots de Farver-Hundskamell un de ruuchlose Hundskamell kaamt nich so faken vör. Vun de Echte Kamell weert de stark aromaatschen Blötenköpp in de Krankenpleeg bruukt. Se lööst Rammen un Smarten, desinfizeert un drievt Sweet, besunners wenn Kinner Kolik un Dörfall hefft. Kunzentreerte Kamellenuttöög sünd as Heelmiddel in’n Hannel.
