Slaget i Hafrsfjord
Frå Wikipedia – det frie oppslagsverket
Slaget i Hafrsfjord står sentralt i norsk historie. I ettertid reknar ein at Noreg vart samla til eitt rike i og med slaget. Kong Harald I Hårfagre kjempa her mot fleire småkongar, og vann over dei.
Ei tidfesting av slaget har vore 18. juli 872, og den 18. juli har vorte feira som Hafrsfjorddagen. Ei anna tidfesting er i åra etter 880, av di ein har rekna ut frå alderen til kong Harald.
Slaget skal ha vore i Hafrsfjord, utanfor den noverande Stavanger by. Dukkarar har leita etter moglege restar etter slaget. Til no er ikkje noko funne. Slik er det uvisst kvar slagstaden eigenteleg var.
Det er uvisst kor avgjerande slaget var for rikssamlinga. Slaget kan ha vore heilt avgjerande, eller berre ei siste kraftmobilisering av fiendane til Harald. Harald hadde tyngdepunkt for makta si på Søraustlandet. Slaget markerer at han knekka den vestnorske opposisjonen.
Slaget bana veg for at Harald kunne får kontroll med det meste av landet og med rette kunne kalla seg konge av heile Noreg. I røynda var rikssamlinga ein prosess som vara fleire hundre år. I vikingtida kunne det vera opptil fleire som kalla seg konge over heile Noreg eller delar av landet.
Småkongane på Sørvestlandet, Agder og Telemark var motstandarane til Harald:
- Eirik, konge i Hordaland, fall
- Sulke, konge Rogaland, fall
- Sute, jarl, bror til Sulke, fall
- Kjøtve, konge Agder, flykta
- Tore Haklang, son til Kjøtve, falt
- Roald Rygg, Telemark
- Hadd den harde, bror til Roald, Telemark
[endre] Etter slaget
Kong Harald Hårfagre skal vera gravlagd i Haraldshaugen. På Hafrsfjorddagen den 18. juli 1872 vart det sett opp eit Riksmonument på Haraldshaugen ved Haugesund. Ein rekna då med at denne dagen var 1000 år etter slaget.
Til minne om slaget i Hafrsjord er det sett opp eit kunstverk i Hafrsfjord. Kunstverket heiter Sverd i fjell.
Om slaget kan ein lesa i Soga om Harald Hårfagre i Heimskringla.
