Thabo Mbeki
vanuit Wikipedia, die vrye ensiklopedie.
Thabo Mvuyelwa Mbeki (gebore 18 Junie 1942 in Idutywa, Queenstown), is die huidige President van Suid-Afrika, asook die ANC. Hy het Nelson Mandela opgevolg as President op 16 Junie 1999. Meneer Mbeki dien tans sy tweede termyn as President (begin op 27 April 2004), nadat die ANC 'n oorweldigende meerderheid gewen het in die 2004 verkiesing. Sy Presidentskap sal in 2009 tot 'n einde kom.
Hy is die seun van Govan en Epainette Mbeki, en het skool gegaan op Idutywa en Butterworth. Hy het hoërskool bygewoon by die Lovedale Institute in Alice, maar is geskors na leerlingstakings in 1959, en moes sy leerwerk tuis voltooi. Mbeki het sy matriek eindeksamen geskryf aan St John's School in Umtata in 1959.
In 1956, terwyl hy nog 'n hoërskoolleerling was, sluit hy aan by die ANC Jeugliga. Na hy sy hoërskoolloopbaan voltooi het, raak hy betrokke by verskeie ondergrondse aktiwiteite in die Pretoria-Witwatersrand gebied na die ANC verban is in 1960. Hy probeer die republiekwording van Suid-Afrika staak in 1961, maar verlaat uiteindelik in 1962 die land op aanbeveling van die ANC.
Mbeki gaan na Zimbabwe en toe Kenia vir 'n kort tyd, voordat hy na Londen gaan waar hy sy Britse A-vlak eksamens voltooi in 1962. Hy sluit aan by die Universiteit van Londen waar hy sy eerstejaargraad in ekonomie voltooi as 'n eksterne student. Terselfdetyd mobiliseer hy studente om in Londen protes aan te teken teen Apartheid. Mbeki studeer in Londen tot 1966 toe hy sy Meestersgraad in Ekonomie verkry vanaf die Universiteit van Sussex.
Vanaf 1967 tot 1970 werk hy vir die ANC se kantore in Londen, wat hom stuur vir militêre opleiding in die Sowjet Unie. Tussen 1971 en 1978 verrig hy verskeie take vir die ANC in Afrika. Hy reis onder andere na Botswana, Swaziland en Nigerië, waar hy met verskeie mense onderhandel. Hy trou ook met sy vrou Zanele Dlamini in 1974.
In 1978 bekleë Mbeki die rang van Politieke Sekretaris in die kantoor van die President van die ANC. Hy styg tot die pos van Direkteur van Departement van Inligting en Publisiteit in 1984, 'n pos wat hy hou tot en met 1989. Hy is ook betrokke by die geheime vergaderings tussen ANC lede en lede van die destydse Nasionale Party regering.
Onderhandelinge tussen dié twee politieke groepe ly daartoe dat die ANC wettig verklaar en dat politieke gevangenis vrygelaat word. Hy is ook betrokke by onderhandelinge wat lei tot die eerste demokratiese verkiesing in 1994, en die opstelling van die nuwe Suid-Afrikaanse grondwet.
Vanaf 1994 tot 1999 tree hy op as Uitvoerende Adjunk-President van die Suid-Afrikaanse regering, waarna hy as President verkies word.
