Wakkerstroom
vanuit Wikipedia, die vrye ensiklopedie.
Wakkerstroom, is die tweede oudste dorp in Mpumalanga in Suid-Afrika. Dit is in 1859 gevestig en die dorp se naam is 'n 'n Afrikaanse vertaling van die Zoeloe naam vir die rivier wat naby die dorp verby vloei, die uThaka, (Wakker). Skaap- en beesboerdery is die hoof nywerhede.
Die dorp is deur Dirk Cornelius Uys (Swart Dirk) gestig wat die gebied opgemeet het en al die erwe uitgelê het met 'n 50-jaart lang riempie wat van 'n elandbulvel gemaak is wat hy geskiet het tydens sy aankoms in Wakkerstroom. Die hofgebou, St Marks kerk en die ou brug oor die Wakkerstroom is as nasionale monumente verklaar. Die roman 'She' is deur H. Ryder Haggard geskryf terwyl hy in Hoogstraat in Wakkerstroom gebly het. Wakkerstroom is deur die 58ste Regiment North Staffordshires, die 80ste Regiment van die South Staffordshires en die 1ste Kings Dragoon Guards beset in 1880/81 tydens die Eerste Vryheidsoorlog. Oorblyfsels van die South Staffordshires Regiment en die Scot Guards se teenwoordigheid kan gesien word op die spits van die Ossewakop en Voortrekkerkop suid van Wakkerstroom.
Die dorp spog met 'n straatbrug, wat in 1893 deur die regering van die destydse Zuid-Afrikaansche Republiek opgerig is. Die staalkonstruksie vir die brug is uit Duitsland ingevoer. Naby die brug vloei die Marthinus Wesselstroom. Hier is Suid-Afrika se eerste Swart lede van die Zion-beweging in 1904 deur D. Bryant van die American Christian Catholic Church in Zion gedoop.
Tydens die Tweede Vryheidsoorlog het die Britte 'n lyn van een-en-twintig Blokhuise tussen Volksrust en Wakkerstroom gebou en een honderd tussen Wakkerstroom en Piet Retief. Die blokhuise is gebou om die Britse se toevoerroete van Durban af te beskerm.
Daar is verskeie San-rotstekeninge te vinde in die gebied om Wakkerstroom. Die gebied is heuwelagteig met klowe, bergfonteine, vleigebiede en damme. Dit is wêreldbekend as 'n voëlkykparadys.
[wysig] Eksterne skakels
 |
Hierdie artikel omtrent Suid Afrika is 'n plekhouer en slegs 'n saadjie. Jy kan Wikipedia help deur dit uit te brei. |
