Perfume
De Biquipedia
Lo perfume ye la mestura feita d'azeites esenzials aromaticas, alcol e un fixador, usata ta dar una ulor agradable á lo cuerpo umán, un ocheuto u bel espazio abitato.
La cantidat d'alcol pende d'a mena de perfume que se'n quier obtener. D'ordinario, la mestura se dixa abiellir lo tiempo d'una añata.
Contenius |
[Editar] Descripzión d'os perfumes
Ye imposible describir un perfume seguntes los suyos componens perque las formulas se mantienen en secreto. E mesmo si se conoxen, los ingrediens son muitos ta poder ufrir una clasificazión unica e útil. Manimenos, los conoxedors pueden aperzibir-ne en cheneral los ingrediens prinzipals. Una d'as maneras de describir-los ye clasificando-los ya siga seguntes la familia olfatiba á la que pertenix la fraganzia u seguntes la suya conzentrazión.
[Editar] Las familias olfatibas
Las fraganzias pueden estar clasificatas en cualques familias olfatibas seguntes lo suyo "acuerde" (accord).
- Florals: fraganzias dominatas per l'aroma d'un u més tipos de flors. Cuan només que se i fa serbir una flor, li'n dizen un soliflore (como lo Diorissimo de Christian Dior, con o lirio de puerto)
- Chypre: fraganzias feitas en un acuerde parexito, que consiste en bergamota, molsa de caxico, pachuli e laudano. Lo nombre ye deribato d'un conoxito perfume de François Coty. (Se beiga baxo la lista de perfumes)
- Aldeidicas: fraganzias que incorporan aldeídos. Lo primer perfume aldeidico estió Nº 5 de Chanel, creyato per lo perfumista franzés Ernest Beaux en 1921. Los perfumes aldeidicos tienen una nota piquant caracteristica.
- Fougère: fraganzias feitas sobre una base d'espícol, cumarina e la "molsa de caxico" (lo líquen Evernia prunastri). Lo nombre probién d'o Fougère Royale de Houbigant, pionero de l'uso d'ista base. Muitas fraganzias d'ombres pertenixen á ista familia aromatica, caracterizata per una ulor penetradera e afustata.
- Cuers: fraganzias con aromas de miel, tabaco e fusta n'as suyas notas meyas u baxas, més una aroma que remera lo cuero.
- Afustatas: fraganzias dominatas per ulors afustatas, como lo sandalo e lo zedro. Lo pachuli acostumbra á estar presén en istos perfumes.
- Orientals u ámbars: fraganzias n'as que predominan las aromas de bainilla e las ulors animals chunto con aromas de flors e fustas. Pueden reforzar-sen per meyo d'azeites canforosas e rasinas d'inzienso, que remeran la simbolochía e conzepzions orientals d'a era bitoriana.
- Zitricas: fraganzias de larga tradizión que consistiban dica abe poco en colonias ta refrescar per la baxa persistenzia d'as aromas zitricas. Lo desembolicamiento de componens més reziens han premitito de creyar berdaderas fraganzias zitricas.
[Editar] Las notas d'as fraganzias
Ta disolber las sustanzias aromaticas se fa serbir una mestura d'alcol e augua. En aplicar-se, la calor corporal fa que lo disolbén s'esparda á priesa, dixando que la fraganzia se bapore á espazio lo tiempo de belas oras. Lo ritmo de baporazión e la fuerza d'a ulor d'o compuesto en determina parzialmén la suya persistenzia, debez que la clasificazión d'a nota d'o perfume.
- Notas altas: las napas d'a fraganzia que se notan deseguida que un perfume s'aplica. Son las que causan la impresión inizial d'un perfume, per lo que son de gran importanzia ta la benta d'o produto. Los elementos que composan las notas altas son fuertes en ulor pero muito bolátils e se baporan á escape.
- Notas meyas: las napas que aparixen á la que se son disipatas las notas altas. Son l'autentico "corazón" d'o perfume, e emmascaran la impresión inizial á ormino desagradable d'as notas baxas, que á bonico se tornan agradables. Las notas meyas acostumbran á fer-se notar entre 2 menutos e 1 ora dimpués de l'aplicazión d'o perfume, e duran á redol d'unas cuatre oras.
- Notas baxas: las napas d'o perfume que aparixen en desparixer las notas altas, mezclando-sen con as meyas ta formar lo tema prinzipal d'o perfume. Son las que atorgan fondura e cuerpo á lo perfume, compuestas á ormino per lo fixadors que enfortixen las notas superiors. No acostumbran á perzibir-sen antis d'aber pasato 30 menutos dende l'aplicazión d'o perfume, pero la suya durata puet estar de més d'un día.
[Editar] La conzentrazión d'os perfumes
Las azeites d'os perfumes se disuelben con un disolbén apropiato ta premitir un millor uso d'o perfume. La disoluzión d'as azeites se fa ta pribar que ibi aigan reazions alerchicas u se malmetan la piel u la ropa per causa de l'alta conzentrazión de componens bolátils.
Lo disolbén que s'emplega d'ordinario ye lo etanol u una mestura d'etanol e augua. Lo perzentache de l'azeite d'o perfume per lo bolumen que bi ha determina lo tipo de fraganzia. Contra més baxo ye lo perzentache de compuestos aromaticos, més baxa la intensidat e durata d'a fraganzia:
- esenzia u estrauto de perfume: 20%-40% de compuestos aromaticos
- augua de perfume u perfume: 10%-30% de compuestos aromaticos
- augua de baño (eau de toilette): 5%-20% de compuestos aromaticos
- augua de colonia u colonia (eau de cologne): 2%-3% de compuestos aromaticos
[Editar] Aromas naturals e sinteticas
[Editar] Fuens bechetals
En perfumería, las plantas son dende abe tiempo la fuen més usata d'as azeites esenzials e los compuestos aromaticos. Las fuens d'ixos compuestos se deriban de dibersas partes d'a planta:
- las flors, como las d'as rosas u los chasmins;
- las fuellas, como las d'espícol, pachuli, bioletas u romero;
- las radizes e los bulbos;
- las simiens, como l'alcarabea;
- los fruitos e lulos, como la bainilla u lo lulo d'o chinipro, e las suyas cascas, sobre tot d'os zitricos;
- las fustas, como la d'o sandalo u l'abetocha;
- la crosta, como la d'o zerimomo;
- las rasinas, como la d'o laudano u la mirra;
- los líquens, como la molsa d'o caxico.
[Editar] Fuens animals
- L'almisque: Deribato en orichen d'as glandolas d'almisque d'o pardo almisquero d'Asia, güe ye estato sostituyito per l'uso d'almisque sintetico debito á lo suyo pre e á cuestions eticas.
- L'algalia: Tamién conoxita como l'almisque d'a zibeta, s'obtién d'as glandolas ulorosas d'as zibetas.
- Lo castorio: Obtenito d'as glandolas ulorosas d'o castor d'America d'o Norte.
- L'ambra grisa: Dita simplamén "ambra" (u "ambre") en perfumería, no ha de trafucar-se con l'ambra feita serbir en orfebrería.
- Bresca: Destilato d'a bresca d'as apellas.
[Editar] Fuens sinteticas
Las aromas sinteticas se creyan per meyo d'a sintesi organica de diferens compuestos quimicos que s'obtienen de destilatos de petrolio, rasinas de pin u belaltra reserba organica barata. Istos sinteticos pueden tener fraganzias que no se troban n'a natura.
La mayoría d'as aromas sinteticas d'o mundo son feitas per unas pocas compañías.
[Editar] Tecnicas t'a obtenzión d'odorans naturals
Antis que los perfumes puedan composar-sen, cal obtener en primeras los odorans usatos. Los odorans sinteticos se produzen per meyo de sintesis organicas e se purifican. Los odorans de fuens naturas han menister de l'uso de diferens metodos ta estrayer los aromas d'as materias primas.
Las tecnicas distorsionan la ulor d'os compuestos aromaticos obtenitos d'as materias en crudo. Ixo se debe á l'uso d'a calor, los disolbens u la esposizión á l'osicheno n'o prozeso d'estrazión, que desnaturalizan los compuestos aromaticos, lo que u bien cambía lo caráuter d'a suya ulor u los dixa inodoros.
- Mazerazión/Estrazión liquido-liquido: Ye la tecnica economicamén importán més usata ta estrayer aromas n'a industria d'o perfume actual.
- Destilazión: Tecnica común ta obtener compuestos aromaticos de plantas. La materia prima s'escalfa e los compuestos fragans se recullen per meyo d'a condensazión d'a bapor destilata. Puet estar destilazión per meyo de bapor u destilazión ixuta u direuta.
- Espresión: La materia prima se comprime e se'n cullen las azeites. Només que s'estrayen asinas las azeites fragans d'as pelas de fruitas zitricas ya que l'azeite i ye tan presén que iste metodo d'estrazión ye economicamén fesible.
- Enfleurage: Tecnica ta absorber l'aroma per meyo d'a zera, estrayendo-ne dimpués l'azeite ulorosa con alcol. La tecnica, usata cuan la destilazión no yera posible, no se fa ya güe debito á lo suyo coste proibitibo e á la esistenzia de metodos d'estrazión més eficazes.
[Editar] Composizión d'os perfumes
La composizión d'un perfume ye importán t'a industria d'o perfume pero tamién ta cualques altras, como las que benden artícols de lucso u produtos alimentizios. La fin ultima d'usar las composizions aromaticas en ixas industrias ye atrayer los cliens e enzitar-los per meyo d'o suyo sendito de l'olfauto á mercar lo perfume u lo produto perfumato. Per ixo ibi ha siempre un gran interés á formular perfumes que la chen considere esteticamén agradables.
[Editar] Lo perfumista
Lo treballo d'a composizión de perfumes se dixa á las mans d'un espierto en ixe quefer conoxito n'o sector como lo perfumista u, de manera més familiar, lo naso, per lo suyo acusato e fin sendito de l'olfauto e abilidenzia n'a composizión d'ulorías. Lo perfumista ye en berdat un artista e un buen conoxedor d'a estetica d'as fraganzias. Lo perfumista no solamén ha de tener buens conoximientos d'un gran amero d'ingrediens aromaticos e las ulors que en fan, e destinguir cadagún d'os ingrediens ya siga per deseparato u en combinazión con altras fraganzias; d'igual manera ha de conoxer la manera en que se manifiesta cada ingredién con altros ingrediens á lo largo d'o tiempo. La fayena d'o perfumista ye parexita á la d'os saboristas n'o feito que los dos composan ulors e gustos ta muitos produtos alimentizios comerzials.
Lo prozeso d'a composizión emprenzipia per un regular con un chicot informe d'os patrons d'o perfumista u de bel clién, normalmén casas de moda u soziedaz grans formatas per dibersas industrias. Cada informe contién las espezificazions t'o perfume deseyato, describindo-ye á ormino en térmens poeticos u abstrautos las aromas u ingrediens á usar n'a composizión d'o perfume.
Lo perfumista encomienza alabez lo prozeso de combinar muitas mesturas de perfumes e mira de trobar las sensazions deseyatas espezificatas n'o informe. Dimpués d'aber presentato las mesturas á los cliens, si s'apreba, lo perfumista puet prozeder á bender-ne la formulazión á lo clién, á ormino con modificazions d'a composizión d'o perfume. Iste prozeso abraca en cheneral dende uns pocos meses á bels años. La composizión d'o perfume s'usará alabez ta reforzar un altro produto como fraganzia funzional (xampús, etz.) u comerzializato e bendito direitamén como fraganzia fina.
Lo perfumista tamién puet simplamén creyar un perfume per inspirazión que se comerzialize dimpués u que pase un informe. Ixo ocurre per un regular en perfumerías chiquetas u independiens.
[Editar] Lo prozeso
D'ordinario, las azeites d'os perfumes contienen dezenas u zentenas d'ingrediens. Encluyitos n'o perfume i son los fixadors, como per ixemplo l'ambra grisa u l'algalia, encargatos de ligar bien las dibersas fraganzias. Istas sustanzias fan ulors desagrables pero en soluzión alcolica actúan como achens conserbaders.
La mestura se dixa abiellir una añata, alto u baxo. La mayoría d'os perfumes e colonias de güe se fan per meyo d'azeites d'as fraganzias que s'elaboran á las casas usando azeites esenzials e sustanzias quimicas aromaticas. Istas azeites se combinan con alcol e augua, se dixan en contenedors un minimo de 14 días e se filtran ta sacar-ne cualsiquier resta de solache antis que la soluzión pueda enfrascar-se ya n'os rezipiens ta perfumes.
[Editar] Istoria d'o perfume
Lo bocable probién d'o latín per fume ("per meyo d'o fumo"). La perfumería, l'arte de fer perfumes, s'orichinó á l'antico Echipto, pero se desembolicó e refinó entre los romans e los arabes. Los perfumes tamién esistiban en Asia oriental, pero muitas d'as suyas fraganzias se basaban n'o inzienso.
Las culturas islamicas contrebuyoron de trazas notorias á lo desembolicamiento d'a perfumería n'o mundo ozidental, igual n'o respectibe á lo perfezionamiento d'a estrazión de fraganzias per meyo d'a destilazión d'a bapor como n'a introduzión de nuebos ingrediens crudos. Los mercaders arabes e persas teneban mayor aczeso t'as diferens espezias, yerbas e altras materias primas t'as fraganzias. Amés de fer-las serbir t'o comerzio, muitas d'ixas materias yeran coltibatas per los musulmans á fin que podesen medrar bien difuera d'os suyos climas orichinals. Un ixemplo n'estaría lo chasmín, orichinario d'Asia oriental.
L'uso documentato de perfumes n'a cultura islamica recula lo menos t'o sieglo VI, considerato un deber relichioso. L'alquimista Chabir ibn Hayyan, clamato á ormino "lo pai d'a quimica arabe", desembolicó muitas tecnicas, encluyitas la destilazión, la baporazión e la filtrazión, que premitiban d'aplegar la uloría d'as plantas en una bapor que podeba cullir-se en forma d'augua u azeite. [1]
Manimenos, lo fundador autentico d'a industria d'o perfume estió lo zientifico al-Kindi, que esperimentó con as combinazions de plantas e altras fuens ta elaborar una bariedat de produtos aromaticos e conseguir buena cosa de "rezetas" ta perfumes, cosmeticos e farmacos.
L'almisque e los perfumes florals s'introduzioron en Europa n'os sieglos XI e XII, prozedens d'Arabia, per meyo d'o trato entre arabes e la chen que tornaba d'as Cruzatas. Lo conoximiento d'a perfumería medró dende lo sieglo XIV.
N'o Renaximiento, yera més que més la nopleza qui emplegaba los perfumes como ichiene diaria ta asconder las ulors corporals. Debito en parte á lo suyo patrozinio, se creyó la industria perfumera en Ozidén. Una d'as fabricas de perfume consideratas més anticas ye la d'o perfumista italián afincato á Colonia, Johann Maria Farina, qui en onor á la suya ziudat d'adopzión dezidió de clamar á la suya fraganzia Eau de Cologne ("Augua de Colonia"). En una carta de 1708, Farina definiba asinas la suya fraganzia:
- Lo mío perfume ye como un maitín italián de primabera zaga la plebia: recuerda las naranchas, los limons, los pomelos, las bergamotas, los zedros, las flors e las yerbas aromaticas d'a tierra mía.
Ta las embueltas d'o sieglo XVIII, se coltibaban plantas aromaticas n'a rechión franzesa de Grasse, á fin de somenistrar materias primas á la crexén industria d'o perfume, e fendo-ne un zentro de gran referenzia t'os perfumers.
En l'actualidat, Franzia contina estando lo zentro prinzipal d'a perfumería europea.
[Editar] La conserbazión d'o perfume
Los componens d'as fraganzias d'os perfumes pierden la suya natura si se guardan de trazas incorreutas en presenzia de:
- calor
- luz
- osicheno
- materials organicos estranios
Una conserbazión adecuata d'os perfumes pasa per mantener-los lueñes de fuens de calor e alzar-los á puestos n'os que no sigan esposatos á la luz. Un frasco ubierto puet conserbar-ne l'aroma intauta lo tiempo d'una añata, siempre que siga plen u cuasi plen, pero á la que lo nibel baxe, la presenzia d'osicheno en l'aire que contién lo frasco alterará lo caráuter odorifero d'o perfume, distorsionando-lo á la fin. [2]
[Editar] Listas de perfumes
[Editar] Perfumes zelebres per año de creyazión
Ista lista ye una relazión de bels perfumes conoxitos. Se i endican, de cucha ta dreita, l'año de creyazión, lo nombre d'o perfume e los nombres d'a compañía e d'o perfumista:
| 1714 | Eau de Cologne | Johann Maria Farina | Johann Maria Farina (1685-1766) |
| 1872 | Hammam Bouquet | Penhaligon's | William Henry Penhaligon |
| 1889 | Jicky | Guerlain | Aimé Guerlain |
| 1902 | Blenheim Bouquet | Penhaligon's | William Henry Penhaligon |
| 1912 | L'Heure Bleue | Guerlain | Jacques Guerlain |
| 1911 | English Fern | Penhaligon's | William Henry Penhaligon |
| 1917 | Chypre | François Coty | François Coty |
| 1919 | Mitsouko | Guerlain | Jacques Guerlain |
| 1919 | Tabac Blond | Caron | Ernest Daltroff |
| 1921 | N°5 | Chanel | Ernest Beaux |
| 1925 | Shalimar | Guerlain | Jacques Guerlain |
| 1927 | Arpège | Lanvin | André Fraysse |
| 1929 | Soir de Paris | Bourjois | Ernest Beaux |
| 1930 | Joy | Jean Patou | Henri Alméras |
| 1932 | Je Reviens | House of Worth | |
| 1934 | Pour Un Homme | Caron | Ernest Daltroff |
| 1944 | Bandit | Robert Piguet | Germaine Cellier |
| 1945 | Femme | Rochas | Edmond Roudnitska |
| 1947 | Vent Vert | Balmain | Germaine Cellier |
| 1948 | L'Air du temps | Nina Ricci | Francis Fabron |
| 1956 | Diorissimo | Christian Dior | Edmond Roudnitska |
| 1959 | Monsieur | Givenchy | |
| 1959 | Cabochard | Parfums Grès | Bernard Chant |
| 1966 | Eau sauvage | Christian Dior | Edmond Roudnitska |
| 1969 | Ô | Lancôme | Robert Gonnon |
| 1973 | Charlie | Revlon | Harry A. Cuttler |
| 1976 | Lily of the Valley | Penhaligon's | |
| 1976 | Violetta | Penhaligon's | |
| 1976 | Z-14 | Halston | Arden |
| 1977 | Opium | Yves Saint-Laurent | Jean-Louis Sieuzac |
| 1978 | Azzaro Pour Homme | Azzaro | Gérard Anthony, Martin Heiddenreich, Richard Wirtz |
| 1978 | Bluebell | Penhaligon's | |
| 1978 | Magie Noire | Lancôme | PFW |
| 1979 | Anaïs Anaïs | Cacharel | Roger Pellegrino |
| 1979 | Ivoire | Balmain | |
| 1981 | Nombre Noir | Shiseido | Serge Lutens, Jean-Yves Leroy |
| 1981 | Giorgio | Giorgio Beverly Hills | Harry A. Cuttler |
| 1983 | Paris | Yves Saint-Laurent | Sophia Grojsman |
| 1984 | Coco | Chanel | Jacques Polge |
| 1985 | Poison | Christian Dior | Jean Guichard |
| 1986 | Prescriptives Calyx | Prescriptives | Sophia Grojsman |
| 1987 | Loulou | Cacharel | Jean Guichard |
| 1988 | Eternity | Calvin Klein | Sophia Grojsman |
| 1990 | Trésor | Lancôme | Sophia Grojsman |
| 1992 | Angel | Thierry Mugler | Olvier Cresp and Yves de Chiris |
| 1993 | Jean-Paul Gaultier | Jean-Paul Gaultier | Jacques Cavallier |
| 1995 | CK One | Calvin Klein | Harry Fremont and Alberto Morillas |
| 1995 | Dolce Vita | Christian Dior | Pierre Bourdon and Maurice Roger |
| 1995 | Le Mâle | Jean-Paul Gaultier | Francis Kurkdjian |
| 1996 | Acqua di Gió Pour Homme | Giorgio Armani | Alberto Morillas |
| 1997 | Envy | Gucci | Maurice Roucel |
| 1999 | No 1 | Clive Christian | |
| 2001 | Coco Mademoiselle | Chanel | Jacques Polge |
| 2001 | Nu | Yves Saint-Laurent | Jacques Cavallier |
| 2003 | 100% Love | Shaping Room | Sophia Grojsman |
| 2005 | Chinatown | Bond No. 9 | Aurelien Guichard |
| 2005 | Rose 31 | Le Labo | Daphne Bugey |
| 2005 | Vertigo | Vertigo Parfums | Cecile Krakower |
[Editar] Perfumes promozionatos per personaches zelebres
N'os zaguers años, bels personaches zelebres han siñato achustes con marcas de perfumes ta asoziar los suyos nombres á una fraganzia como meyo d'autopromozión. Ixa asoziazión se considera un atractibo comerzial n'as campañas d'a marca d'os produtos, perfumes que no gosan de tener la lonchebidat d'as fraganzias clasicas. Astí baxo puet beyer-se-ne una relazión:
- Ashanti: Precious Jewel
- Antonio Banderas: Spirit, Mediterraneo, Diavolo Hypnotic, Diavolo Donna, Diavolo
- David Beckham: Instinct, Intimately for Him
- Victoria Beckham: Intimately for Her
- Cher: Uninhibited
- Alan Cumming: Cumming, Cumming Wild Thyme
- Celine Dion: Celine, Celine FEMME, Celine Dion Notes, Celine Dion Belong
- Hilary Duff: With Love
- Paris Hilton: Paris Hilton, Paris Hilton for Men, Just Me, Just Me for Men, Heiress
- Enrique Iglesias: True Star (refirmata per Tommy Hilfiger)
- Derek Jeter: Driven
- Michael Jordan: Michael Jordan, Jordan
- KISS: KISS Her, KISS Him
- Beyoncé Knowles: True Star, True Star Gold (refirmata per Tommy Hilfiger)
- George Kurdahi: Lebanon's George Kurdahi, GK
- Jennifer Lopez: JLo Glow, Still, Miami Glow, Love at First Glow, Live, Live Luxe
- Madonna: Madonna 1978
- Sarah Jessica Parker: Lovely
- Britney Spears: Curious, Fantasy, In Control, In Control Curious
- Elizabeth Taylor: Passion, White Diamonds, Forever Elizabeth, Black Pearls, Diamonds & Emeralds, Diamonds & Rubies
- Shania Twain: Shania by Stetson
- Kylie Minogue: Darling
[Editar] Referenzias
- ↑ Levey, Martin (1973), "Early Arabic Pharmacology", E.J. Brill: Leiden, ISBN 90-04-03796-9
- ↑ Burr, Chandler (2003). The Emperor of Scent: A Story of Perfume, Obsession, and the Last Mystery of the Senses. Nueba York: Random House. ISBN 0-375-50797-3
[Editar] Binclos esternos
- Biblioparfum Replega de més de 600 libros sobre perfumes. (En franzés e anglés)
- Scented Pages Catalogo birtual adedicato á la cultura d'as ulors. (En anglés)
- Images de Parfums Replega d'imáchens comerzials de fraganzias.
