Alfonso Velázquez
De Uiquipedia
Alfonso Velázquez (Tinéu, 1956) ye un poeta y narrador asturianu.
Alfonso Velázquez, llicenciáu en Ciencies Polítiques pola Universidá Complutense de Madrid y profesor n'un institutu de Secundaria, ta consideráu como un autor marxináu poles instituciones académiques asturianes. Na década de 1970 participó nel desendolcu, nel marcu del Conceyu d'Asturies de Madrid, d'unes normes ortográfiques qu'él siguió emplegando nos años entrantes.
Nes décades de 1980 y 1990 desenvolvió bona parte del so llabor lliterario cola espublización de delles obres poétiques y narratives en revistes y antoloxíes collectives.
En 1992 asoleya'l poemariu Cuadernu de Camden Town, col qu'algamó'l premiu Teodoro Cuesta de poesía ex aequo con Lourdes Álvarez. N'esi mesmu añu, la editorial Trabe recueye nun volume la so narrativa completa, apaecía en forma de relatos en delles revistes, fundamentalmente Adréi. El cuentu L'arume l'escaezu, exemplu de lliteratura de temática homosexual n'asturianu, dio nome al llibru, y ta consideráu como ún de los más valoratibles testos de la narrativa del Surdimientu.
Velázquez tien tornao tamién al asturianu poemes del escocés Robert Burns; la obra La tierra ermo, de T.S. Elliot (1994), y El gran Gatsby, de F. Scott Fitzgerald (1998).
[editar] Bibliografía
- L'arume l'escaezu: Ediciones Trabe, Uviéu (1992) ISBN 84-8053-013-8.
