Frederic Mistral
De Uiquipedia
Frederic Mistral ( Frederi Mistral según les normes ortográfiques del Felibritge, Frédéric Mistral en francés), foi un escritor francés n'occitanu que vivió ente los años 1830 y 1914.
Foi miembru fundador del Felibrige, impulsor de la norma ortográfica conocida dacuando col so nome y inspirador de publicaciones como l' Armana Prouvençau y L'Aïoli. Nel campu de la lexicografía, dedicó más de venti años de trabayu a la redacción del monumental diccionariu Lou Tresor dóu Felibrige.
La so poesía, con obres como Mirèio, Calendau o Lou poeumo dóu Rose ta considerada como una de les meyores de tola historia de la lliteratura occitana.
Frederic Mistral foi reconocíu yá en vida como'l principal responsable de la recuperación del provenzal como llingua lliteraria na segunda metá del sieglu XIX. En 1904 recibió'l Premiu Nobel de Lliteratura.
[editar] Elementos biográficos
Frederic Mistral nació en Maillane (Provenza) el 8 de setiembre de 1830. Yera fíu d'unos terratenientes emparentaos con dalgunes de les families más antigües de Provenza.
Estudió bachilleratu en Nîmes y Derechu en Aix-en-Provence.
N'acabando los estudios, siguiendo los pasos de Josèp Romanilha y d'Honnorat, dedica los sos esfuerzos a la recuperación y al estudiu del provenzal.
En 1852, tres de la muerte de so pá, instalóse dafechu na casería de la familia, conocida como'l Mas dau Jutge (Mas dóu Juge na norma ortográfica del Felibritge).
El 21 de mayu de 1854 tien llugar la fundación oficial del Felibritge nuna reunión en Font-Ségugne cerca d'Aviñón, na que participó con otros seis poetes, ente los que destaquen Josèp Romanilha y Teodòr Aubanèu.
El llabor de Mistral, dende l'interior del Felibritge, foi decisivu na fixación de la norma llingüística y ortográfica que diba valir de base a la recuperación del provenzal como llingua lliteraria. Nesti sen, obres como Mirèio (1859), Calendau (1867), Lis isclo d'or (1875) o Lou pouemo dóu Rose (1897) representaron el modelu a imitar pa munchos poetes, dientro y fuera de Provenza.
Per otra parte, anque nun primer tiempu foi partidariu d'una ortografía más averada a la etimoloxía, adoptó bien ceo la norma creada por Romanilha. Mistral contribuyó al ésitu d'esi sistema ortográficu usándolu na versión definitiva de Mirèio, nos testos del Armana Prouvençau y otres publicaciones del Felibritge o incluso nes correcciones a les obres d'otros autores como Aubanèu. Anguaño, por fidelidá a Mistral, siguen mandándose d'él dellos escritores n'occitanu, principalmente en Provenza.
En 1854 entamó la redacción del Tresor dóu Felibrige, que nun peracabó hasta 1886. Esti diccionariu , que sigue siendo anguaño'l más completu de la llingua d'oc, contién innumerables variantes dialectales y ortográfiques de cada pallabra. Sicasí, pue considerase un diccionariu normativu, al colocar sistematicamente al principiu de cada artículu la forma propia del provenzal rodanianu, preconizada polos autores del Felibritge.
Como capolier ("cabezaleru") del Felibritge, ente 1876 y 1888, ayudó a esparder movimientu per tol territoriu d'oc. Sicasí, la so acción trespasó les fronteres de Provenza y del dominiu llingüísticu occitanu. Partidariu de la creación d'una Unión llatina, entró en contactu colos autores de la Renaixença catalana, a los que dedicó'l poema La Coupo Santo y de la xoven Rumanía. Nesti sen, en 1868 viaxó a Barcelona pa participar nos Xuegos Florales y manifestó la so almiración por Jacint Verdaguer. En 1875, presidió les Fiestes llatines de Montpellier, nes que se coronó al poeta nacional rumanu Vasile Alecsandri.
En 1904 recibió, ex aequo col dramaturgu español José Echegaray, el premiu Nobel de Lliteratura . Dedicó'l dineru del premiu a la creación d'un Muséu na ciudá d'Arles.
Morrió el 25 de marzu de 1914 nel so pueblu natal de Maillane.
[editar] Obres
En versu
- Mirèio ( Mirelha ) - 1859
- Calendau (Calendal) - 1867
- La Coupo Santo ( La copa santa ) - 1867
- Lis isclo d’or ( Les isles d'oru ) - 1875
- Nerto (Nerta), narración en versu - 1884
- La rèino Jano ( La reina Xuana ), drama en versu - 1890
- Lou pouemo dóu Rose (El poema del Ródanu ) - 1897
- Lis óulivado ( El tiempu de les aceitunes ) - 1912
En prosa
- Lou tresor dóu felibrige (L'Ayalga del Felibritge) , diccionariu en dos volumes -1878 y 1886.
- Moun espelido, Memòri e Raconte (El mio surdimientu, memories, y rellatos) - 1906.
- Discours e dicho (Discursos y dichos) - 1906.
- La genèsi, traducho en prouvençau (El Xénesis traducíu en provenzal) - 1910
Obres póstumes y inédites
