Kim Yong Il
De Uiquipedia
Kim Yong Il, políticu y gobernante norcoreanu apodáu "Queríu Líder" nel so país. Fíu de Kim Il Sung, "Gran Líder" de Corea del Norte. Pertien los cargos de Presidente del Comité de Defensa Nacional y el de Secretariu Xeneral del Partíu de los Trabayadores coreanu.
Oficialmente nació nel míticu monte Paektu, en Corea, en plena guerra contra Xapón pente la (Segunda Guerra Mundial), el 16 de febreru de 1942. Sicasí, les versiones occidentales apunten a que naciera un añu enantes nun campamentu refuxaos soviéticu, cerca de la frontera, onde pasaría los primeros años de la so vida, hasta la fin de la guerra. Kim Yong Il entamó xoven la so preparación política. Estudió en China, na universidá Kim Il Sung de Pyongyang, (onde cursó Ciencies Polítiques y Económiques) y na antigua República Democrática Alemana, nuna academia militar. Acabada la so formación, Kim Yong Il algamó dellos cargos na alministración norcoreana, especialmente nel departamentu nacional de Cultura. Foi entós, según les biografíes oficiales, cuando Kim Yong Il desenrrolló la so faceta artística. Poemes y narraciones patrióticos, teatru, llargometraxes y obres arquitectóniques foron dellos de los proyeutos atribuyíos al fíu del "Gran Líder", que diba con ello algamando pesu nel aparatu estatal.
[editar] Llegada al poder
Nun foi hasta la década de 1980 cuando s'esclarió'l so futuru como sucesor de Kim Il Sung al frente del gobiernu norcoreanu. Pocoñín a poco foi asumiendo responsabilidaes, de forma paralela a les reformes que so padre lideró nel senu del aparatu estatal pa favorecer una "renovación" del "progresismu norcoreanu". Esa renovación tradúxose na promulgación de la nueva Constitución de la República Popular Democrática de Corea, d'inspiración comunista y qu'instaura una ideoloxía propia (el Xuché). El 21 d'abril de 1992, Kim Yong Il púnxose al frente l'Estáu. Pero nun foi hasta depués de la muerte de Kim Il Sung, el 8 de xunetu de 1994, cuando Kim Yong Il asumió oficialmente la presidencia'l país, anque'l so cargu, en realidá, seya'l de Xefe de la Comisión Nacional de Defensa.
La socesión llevóse d'un mou progresivu. Yera la primer vegada qu'un réxime comunista convertíase en dinásticu y la tensión col esterior féxose fonda. Oficialmente, Kim Yong Il algamó'l poder tres de superar los mecanismos d'elleición de dirixentes del estáu y nun tuvo que ver un res la so condición de fíu del Gran Líder. N'Occidente, por embargu, falóse entós d'un procesu corruptu nel que fuera desaniciada (mesmo físicamente) la oposición interna a la socesión de Kim Yong Il.
[editar] Gobiernu
Los primeros años de gobiernu de Kim Yong Il foron enforma complexos. Una serie d'atentaos nel estranxeru, fundamentalmente escontra intereses surcoreanos, foron atribuyíos darréu a Corea del Norte. La tensión col esterior afondó coles diferencies pol procesu desarme nuclear norcoreanu que fructificó nel posterior Alcuerdu Marcu de desarme y nel programa KEDO, (con Kim Il Sung inda nel poder). A ello axuntáronse los episodios de fame provocaos poles inundaciones y posteriores seques de los primeros años de la década de 1990, que contribuyeron tamién a comprometer al gobiernu de Kim Yong Il. Nesi tiempu, les apaiciones públiques n'Occidente de Kim Yong Il foron nules. La propaganda estaunidense y la falta d'imaxenes del gobernante propició la especulación sobre la so muerte, daqué desmentío depués cola so presencia n'actos públicos. Les armes nucleares, el llanzamientu de cohetes Taepodong, la falta d'alimentos, la precariedá pa la estracción de materies primes, la tensión fronteriza con Corea del Sur y l'enfotu pola unificación de dambes "corees" foron forzando contactos con China, Estaos Xuníos, Xapón y Corea del Sur. Ello fructificó nuna relaxación de les rellaciones, especialmente col Sur, qu'algamó'l puntu cimeru ente'l 13 y el 15 de xunu de 2000, feches nes que Kim Yong Il recibió en Pyongyang al presidente surcoreanu Kim Dae Yong, el gran impulsor del acercamientu énte la oposición estadounidense. L'aconceyamientu sirvió pa iniciar pequeños avances: el reencuentru de familiares o la distensión de les rellaciones foron les primeres consecuencies. La entrada nel sieglu XXI supunxo un averamientu del gobiernu de Kim Yong Il al restu'l mundu. L'apertura de rellaciones con Rusia y con países de la Xunión Europea, (que se sumaba a la d'otros países africanos, asiáticos y llatinoamericanos), confirmaron que la estratexa de política internacional (forzar tensión p'algamar delles ventaxes), sirvió pa enfriar la tensión na que la península lleva sumida dende la so dixebra en 1945. Kim Yong Il entamó de nuevo esa política de xestión de la tensión ente los años 2003 y 2004. La inclusión pola alministración del presidente d'Estaos Xuníos, George W. Bush, de Corea del Norte nun exe del mal de países capaces de desestabilizar l'equilibriu mundial, fexo que dende Pyongyang contribuyérase a azuzañar la tensión na Península per aciu l'anunciu d'abandonu del Tratáu de non proliferación nuclear que Corea del Norte firmara na década de 1990. Posteriores negociaciones rebaxaron la tensión con renovaos alcuerdos ente Estaos Xuníos y Corea del Norte nunes negociaciones nes que tamién intervinieren Corea del Sur, Xapón o China.
