Margarita Salas
De Uiquipedia
Margarita Salas Falgueras, (30 de payares de 1938, Caneiru, Valdés), ye una bioquímica asturiana.
Llicenciada en Ciencies Químiques pola Universidá Complutense de Madrid, tien asoleyaos más de 200 trabayos científicos. Foi discípula de Severo Ochoa, col que trabayó nos Estaos Xuníos.
Entamó la so carrera científica en 1961, faciendo la so tesis doctoral col profesor Alberto Sols, nel Centru d'Investigaciones Biolóxiques de Madrid. Foi depués d'esta dómina cuando entamó a trabayar con Severo Ochoa, tornando a España nel añu 1967, pa trabayar nuevamente nel Centru d'Investigaciones Biolóxiques xunto col tamién científicu Eladio Viñuela, col que se casaría, y col que s'encargó d'impulsar la investigación española nel campu de la bioquímica y de la bioloxía molecular.
Pertenez a les sociedaes y institutos científicos nacionales y internacionales de mayor sonadía, collaborando y siendo miembru del conseyu editorial de les más importantes publicaciones científiques. Tien algamao dellos galardones, siendo nomada 'Investigadora europea 1999' pola UNESCO y recibió'l premiu Xaime I d'investigación en 1994. Foi nomada directora del Institutu d'España, organismu qu'amesta a la totalidá de les academies científiques españoles. Igualmente foi Presidenta del Conseyu Social de la Universidá d'Uviéu durante cuatro años.
Anguañu (2004) investiga nel Centru de Bioloxía Molecular "Severo Ochoa" de la Universidá Autónoma de Madrid y el Conseyu Superior d'Investigaciones Científiques, onde sigue trabayando col virus fago f29.
