Esperantomuzeo kaj Kolekto por Planlingvoj
El Vikipedio
La Esperantomuzeo kaj Kolekto por Planlingvoj estas sekcio interne de la Aŭstria Nacia Biblioteko (ANB). Fondita en 1927 fare de Hugo Steiner kiel asocio, ĝi fariĝis parto de ANB en 1928 kaj inaŭguriĝis en 1929 en solenca ceremonio kun la ĉeesto de gravaj personoj de la internacia esperantistaro kaj la aŭstra politikistaro. En sia pli ol 80-jara ekzisto ĝi fariĝis la plej granda biblioteko de Esperanto kaj aliaj planlingvoj. La muzeo estas plej efika informa centro pri Esperanto.
Enhavo |
[redaktu] Historio
Ekde la komenco Hugo Steiner celis krei ankaŭ bibliotekon por Esperanto kaj aliaj planlingvoj. La kolekto rapide kreskis danke al internacia subteno kaj fariĝis mondfama. Post la anekso de Aŭstrio fare de la nazioj en 1938, la Gestapo fermis la Esperantomuzeon, sed pro la fakto, ke la materialo apartenis al ANB, nenio estis detruita. En 1947 okazis la reinaŭguro kaj en la kvindekaj kaj sesdekaj jaroj la unua kaj dua dungo de profesiaj bibliotekistoj, Herbert März kaj Walter Hube, kiu direktoriĝis en 1965. Ekde 1985 gvidas ĝin Herbert Mayer. 1990 aldoniĝis plia funkcia nomo, kiu rilatas al tiu biblioteka rolo: ‘’’Kolekto por Planlingvoj’’’. En 1995 la biblioteko ricevis trian postenon. 2005 okazis la translokiĝo al la Palaco Mollard. Temas pri nove restaŭrita baroka palaco en la centro de Vieno inter la Ministerio por Internaj kaj la Ministerio por Eksteraj Aferoj.
[redaktu] La muzeo
Sur 80 m2 la vizitanto ricevas gravajn informojn pri la historio de Esperanto kaj ĝia hodiaŭa disvastiĝo. La klarigaj lingvoj estas Esperanto, la germana kaj la angla. Kvar komputilaj instalaĵoj, ekrano kun lingvaj ludoj kaj du filmoj prezentas la faktojn en moderna kaj facile alirebla formo. La muzeo estas inkluzivita en la publikrilata laboro de la Aŭstria Nacia Biblioteko, kio klarigas la fakton, ke rilate al ĝia grandeco la muzeo havas eksterordinare multajn vizitantojn. Ekzemple en 2006 pasis tra ĝi 5000 personoj.
[redaktu] La biblioteko
La Kolekto por Planlingvoj ne nur estas la plej granda de sia speco. Ĝi estas ankaŭ profesie organizita kaj troviĝas sur la plej moderna nivelo de la biblioteka teknologio. Konvena klimatizita stokado, kontraŭ-incendiaj instalaĵoj, daŭra kontrolo de ilia stato kaj regula restaŭrado garantias plej bonan konservadon de la dokumentoj. Krome ĝi ofertas ĉiujn servojn de moderna biblioteko. Ampleksa deĵora horaro (32 horojn en la semajnoj) faciligas la aliron.
[redaktu] La havaĵo
30.000 libroj kaj broŝuroj, 2500 titoloj de revuoj, 2000 muzeaj objektoj, 2000 aŭtografoj kaj manuskriptoj, 30.000 fotoj, 1.100 afiŝoj, 40.000 flugfolioj kaj unuopaj gazetartikoloj, dokumentoj pri 500 planlingvoj. Menciendas, ke ne estas kalkulitaj duoblaĵoj, tiel ke la realaj nombroj estas efektive pli grandaj ol la menciitaj.
[redaktu] TROVANTO
TROVANTO estas la nomo de reta katalogo de la kolekto kun 37.364 rikordoj, kio korespondas al samnombraj bibliotekaj unuoj (stato: marto 2007). Ĝi estas la plej granda Esperanto-katalogo kaj daŭre kreskas. Principe estas en ĝi ĉiuj dokumentoj krom la fotoj, la muzeaj objektoj kaj la afiŝoj. La katalogo permesas la trovon de la dokumentoj laŭ pluraj principoj. La serĉada lingvo estas Esperanto kaj la germana. (Pro transmigro de la datenoj nun Esperanto forfalis, sed realdoniĝos baldaŭ.). Aliro eblas tra la hejmpaĝo de la kolekto.
[redaktu] La katalogo por la fotoj
La kolekto posedas proksimume 30.000 fotojn. Ekde 2007 okazas regula enkatalogigo kaj skanado (videbla ankaŭ en interreto) de la fotoj en la “Bilddatenbank” (datenbanko por bilda materialo) de la Bilda Arkivo de ANB, kies priskriba lingvo estas la germana. Ankoraŭ relative malmultaj fotoj estas prilaboritaj (komence de marto 2007: 400), sed la kresko estas konstanta. Eblas serĉi per la vorto “Esperanto” kaj aldona vorto: Ekzemple per la serĉvortoj “Esperanto” kaj “Wien” vi ricevas bildojn de Esperanto-okazaĵoj en Vieno. Aranĝojn oni povas serĉi ankaŭ laŭ la Esperanta nomo: “Universala” tial kondukos vin al ĉiuj fotoj de la Universalaj Kongresoj.
Fotoj ne skanitaj ne estas serĉeblaj rete. Se vi do nenion trovas, povas tamen esti, ke ekzistas foto. Turnu vin en tiu kazo rekte al la kolekto per retletero.
[redaktu] La katalogo por afiŝoj
Ĝi enhavas 1100 afiŝojn, precipe Esperantajn. Por konsulto oni devas rekte turni sin al la kolekto, ĉar ĝi ne estas en la reto.
[redaktu] La datumbanko por postlasasĵoj
Tiu datumbanko de ANB, kiu nomiĝas HANNA, entenos ekde 2008 ankaŭ Esperanto-postlasaĵojn kaj antaŭlasaĵojn.
[redaktu] La skan-projekto
En 2007 enretiĝis cent skanaĵoj de la tiel nomataj „inkunabloj“ de Esperanto. Aliro eblas tra la hejmpaĝo de la kolekto. Temas pri la tute unuaj libroj kaj broŝuroj en Esperanto, aperintaj inter 1887 kaj 1900.
Sed tio estas nur la komenco de granda projekto, kiu disvolviĝas kadre de la Aŭstria Nacia Biblioteko. En la sekvaj jaroj la Kolekto por Planlingvoj skanos sian tutan stokon de revuoj aperintaj ĝis 1945 kaj faros ĝin rete legebla en konvena formo. Jam fine de 2007 la unuaj el tiuj revuoj estos en interreto.
[redaktu] La eldona fako
La eldona fako de la Esperantomuzeo, kies mallongigo IEM ankoraŭ rilatas ankoraŭ al la alia nomformo Internacia Esperanto-Muzeo, eldonas ekde 1995 ĉiujare 1 – 2 librojn, precipe originalan literaturon. Per tio Esperantomuzeo estas nun tutmonde la sola ŝtata instanco, kiu aperigas regule Esperanto-librojn.
[redaktu] Kursoj kaj aranĝoj
En la ejoj de la muzeo kaj la kolekto regule okazas kursoj, seminarioj, kolokvoj, simpozioj. La sekva kurso estos la 21an kaj 22an de aprilo 2007. Kolokvo pri Esperanto-bibliotekoj disvolviĝos al 19an kaj 20an de oktobro 2007.
[redaktu] La nomo
Valida nomo apud la supre menciita estas ankaŭ “Internacia Esperanto-Muzeo” kun la mallongigo “IEM”. La pli mallonga nomformo “Esperantomuzeo”, enkondukite en 2004 por atingi integriĝon en la publikrilatan koncepton de ANB, estas hodiaŭ la ununura oficiale uzata. La nomo “Internacia Esperanto-Muzeo en Wien” (IEMW), kun la variaĵo „Internacia Esperanto-Muzeo en Vieno” (IEMV), kiun utiligis precipe la fondinto, tamen neniam estis oficiala kaj rilatas hodiaŭ ekskluzive al asocio, kiu subtenas la laboron de tiu sekcio de la Nacia Biblioteko.
[redaktu] Adreso
Ejo
Esperantomuzeo kaj Kolekto por Planlingvoj
Palais Mollard
Herrengasse 9
1010 Vieno
Austrio
Poŝtadreso
Esperantomuzeo kaj Kolekto por Planlingvoj
Josefsplatz 1
1015 Vieno
Austrio
[redaktu] Deĵoraj horoj
- Esperantomuzeo:
- lun. – merkr., vendr. – sab. 10h00 – 14h00
- ĵaŭde 15h00 – 19h00
- Kolekto por Planlingvoj:
- lun. – merkr., 9h00 – 16h00
- ĵaŭde 12h00 – 19h00
- vendr. 9h00 – 13h00
