Ho, mia kor'
El Vikipedio
Ho, mia kor'. Poemeto de Zamenhof, verkita nelonge antaŭ eliro de la Unua Libro 1887. "En tiaj tagoj Zamenhof verkis versaĵon tre mallongan. Ĝi sonas iom kiel spirado malfacila de homo suprenkurinta kvin etaĝojn de ŝtuparo kaj staranta antaŭ pordo halte." (Privat, Vivo de Zamenhof, p: 35.)
Ho, mia kor' (L. L. Zamenhof)
Ho, mia kor', ne batu maltrankvile,
el mia brusto nun ne saltu for!
Jam teni min ne povas mi facile,
ho, mia kor'!
Ho, mia kor'! Post longa laborado
ĉu mi ne venkos en decida hor'?
Sufiĉe! trankviliĝu de l' batado,
ho, mia kor'!
