Ziko van Dijk
El Vikipedio
D-ro Ziko VAN DIJK (naskiĝis en 1973 kiel Marcus Sikosek) estas germana esperantisto ekde 1987/1988. La baptonomo estas Marcus, sed li preferas Ziko (voknomo el bazlernejaj tempoj). La iama familia nomo Sikosek venas de praavo el la nuna Slovenio. Ekde 2006, post edziĝo, li nomiĝas van Dijk. Tiu nederlanda nomo signifas "de digo".
[redaktu] Vivo
Van Dijk naskiĝis en Kirchhellen en Vestfalio / Germanio, sed kreskiĝis en la najbara urbo Gladbeck. Tie li ricevis la abituron (lernejfinan diplomon) en 1992. Nun li loĝas en orienta Nederlando, li estas la UEA-Delegito de Varsseveld.
Post studoj en Bochum, Utrecht kaj Kolonjo li fariĝis magistro pri historio, kromfako germana filologio. En 2006 li doktoriĝis en Utrecht. Van Dijk parolas, krom sia gepatra lingvo kaj Esperanto, la nederlandan kaj anglan, iomete la francan.
[redaktu] Esperanto-movado
Li havis diversajn taskojn kaj postenojn en Germana Esperanto-Junularo kaj Germana Esperanto-Asocio, i.a. informado kaj la redaktado de la GEA-gazeto Esperanto aktuell. De februaro 2003 ĝis junio 2005 li laboris kiel bibliotekisto kaj arkivisto en la Biblioteko Hector Hodler. Li fondis kaj administras la yahoogroup-ojn "ehist" pri Esperanto-historio kaj "pivgrupo" pri Plena Ilustrita Vortaro. Li estas cetere redaktoro de Vikipedio, Vikipediisto:Ziko
[redaktu] Verkoj
- Esperanto sen mitoj (1999, 2003) pri kaj por Esperanto-informado
- (Red.) Tiel sonis... (2003/2004), serio de kompaktdiskoj kun materialo de Biblioteko Hector Hodler
- Books and their association: The history of the Hector Hodler Library. En: Language Problems and Language Planning 28 (2004), n-ro 1, p. 45-73
- Dokumente zum „Weltspracheverein Nürnberg“. En: Esperantologio / Esperanto Studies, kajero 3 (2005), p. 42-51
- Sed homoj kun homoj (2005) pri la centjara historio de la Universalaj Kongresoj de Esperanto
- Die neutrale Sprache (2006), disertacio pri la politika historio de UEA
