Jean Ulveling
Vu Wikipedia, der fräier Enzyklopedie.
De Jean Ulveling (gebuer de 14. Germinal vum Joer IV. (3. Abrëll 1796) zu Nidderwolz; gestuerwen de 7. Dezember 1878 an der Stad) war e lëtzebuergesche Staatsbeamten, Politiker an Historiker.
Hien ass 1817 an d'Regierungsverwaltung agetrueden, wou e séier Carrière gemaach huet. 1820 koum en an de Cabinet vum Gouverneur Jean-Jacques Willmar. Bei der Belscher Revolutioun war hien op der Säit vun den Orangisten. An engem Pamphlet, dat en 1832 publizéiert huet, huet hien dem Wëllem I. vun Holland seng Politik an héchsten Téin gelueft.
1840, nodeems d'Fro ëm Lëtzebuerg endlech gereegelt war, gouf den Ulveling Member vun der provisorescher Regierung, "Régence" genannt. 1842 gouf e Conseiller des Douanes. 1848 huet hie mat un der neier Verfassung matgeschriwwen a gouf den 1. August Member vun der Regierung de la Fontaine an am Dezember, nodeems dës zeréckgetruede war, an deeër vum Willmar. Hie war zoustänneg fir Finanzen a Gemengen. Wéi dës 1853 vun der Regierung Simons ofgeléist gouf, gouf den Ulveling Member vum Verwaltungsrot vun de Stater Hospices Civils an Direkter vun der Caisse de Crédit Foncier. 1855 gouf en zousätzlech Direkter vun der Steierverwaltung an 1857 vum Kadaster.
1854 gouf de Jean Ulveling Gemengerot vun der Stad Lëtzebuerg, an 1855 an 1858 Schäffen.
1858 gouf hien nees Generaldirekter (Minister), dës Kéiers an der Regierung Simons. Hie war fir d'éischt fir den Intérieur, dunn fir d'Finanzen zoustänneg. Och an der Regierung de Tornaco, 1860 war hie fir dës Dossierë responsabel. 1866 huet e séng Démissioun ginn.
Vun 1866 bis kuerz viru sengem Doud war hie Member vum Staatsrot.
De Jean Ulveling huet och eng ganz Rëtsch Publikatiounen hannerlooss: E puer ware Réckblécker iwwert d'politesch Situatioun vun deene Perioden, déi e materlierft hunn, déi meescht awer hu sech mat historeschen Theme befaasst.
Virun allem d'Baugeschicht vun der Festung Lëtzebuerg hat him et ugedoen, heizou huet hien eng sëllechen Artikelen an de Publications de l'Institut Grand-Ducal, Section Historique publizéiert. Mee och zu der Geschicht vun den Zënften an der Stad an zu deeër vun der Abtei Almënster, fir just déi Themen ze ernimmen, huet hie geschriwwe gehat.
De Jean Ulveling ass de 7. Dezember 1878 gestuerwen.
