Luc Frieden
Vu Wikipedia, der fräier Enzyklopedie.
De Luc Frieden gebuer de 16. September 1963 zu Esch-Uelzecht) ass e lëtzebuergesche Politiker.
No senger Première am Staadter Athenäum, 1982, studéiert de Luc Frieden Handelsrecht um Cours an der Stad an op der Sorbonne zu Paräis, wouranner en 1986 eng Maîtrise mécht. 1987 gëtt hien Master of Comparative Law and Legal Philosophy op der Universitéit vu Cambridge (Groussbritannien) an 1988 Master of Laws op der Harvard Law School an Amerika. Nierwelaangscht mécht hien och nach Coursën op der John F. Kennedy School of Government.
Tëschent 1989 an 1998 ass de Luc Frieden Affekot um Staadter Barreau, enseignéiert lëtzebuergeschen Droit um Cours an der Stad a verëffentlecht Artikelen iwwer Bankerecht a Verfaasungsrecht. Tëschent 1981 an 1994 ass hie fräie Mataarbechter vum lëtzebuergesche Programm vun RTL, wou en iwwer juristesch an aussepolitesch Theme schwätzt.
1994 gëtt de Luc Frieden fir d'éischte Kéier op der Lëscht vun der CSV an d'Chamber gewielt. De 4. Februar 1998 gët hien an der Regierung Juncker-Poos Minister fir Justiz, Budget a Bezéiunge mam Parlament, an ass och zoustänneg fir d'Aféiere vum Euro zu Lëtzebuerg.
De 7. August 1999 gëtt hien, an der Regierung Juncker-Polfer op en neies Justiz- a Budgetsminister, och zoustänneg fir d'Bezéiunge matt der Chamber.
Zanter dem 31. Juli 2004, an der Regierung Juncker-Asselborn, ass de Luc Frieden Minister fir Justiz, Budget a - bis den 22. Februar 2006 - Minister vun der Verdeedegung.
De Luc Frieden ass bestuet a Papp vun 2 Kanner.
