Michel Lentz
Vu Wikipedia, der fräier Enzyklopedie.
De Michel Lentz (* 21. Mee 1820 an der Stad; † 8. September 1893) war den Dichter vum lëtzebuergesche Nationallidd Ons Heemecht.
Inhaltsverzeechnis |
[Änneren] Säi Liewen
De Michel Lentz, de Jong vum Beckermeeschter Jean-Pierre Lentz a sénger Frau Marguerite Spresser koum an der Chimaysgaass den 21. Mee 1820 Mëttes e Véirel op eng op d'Welt. Ëm 1820 hat säi Papp um Eck vun der Chimaystrooss an der Ënneschtgaass dat Haus kaft. Kuerz drop huet hien nach e klengt an der Ënneschtgaass kaaft, fir do seng Bäckerei ze féieren.
No senger Primärschoul ass de Michel Lentz an de Kolléisch gaang, wou hien 1840 säi Premièresdiplom krut. No engem Joer Philologie an der Bréisseler Université Libre ass hien Enn 1842 an d'Sekretariat vun der Regirung ernannt ginn. Den 10. September 1851, de Lentz war do scho "Commis de Première Classe", huet hien sech mat der Jeanne Reuter bestued, dem Meedchen vun engem pensionéierte Schoulmeschter aus der Stad. Si haten dräi Kanner: d'Mathild, d'Elise an de Pierre-Mathis-Edmond, deen 1899 gestuerwen ass.
Berufflech ass et weider erop gaangen. 1857 war de Michel Lentz Ënnerbürochef, 1869 scho Bürochef a Conseiller an der Rechungskummer, eng Plaz, déi hien bis zur Pensioun 1892 hat. Den 8. September ass de Lentz, deen zu deeër Zäit bal blann war, gestuerwen.
De "Nationaldichter" krut den 10. September e Staatsbegriefnes , an de Staatsminister Paul Eyschen huet d'Läicheried gehalen.
[Änneren] Ee Monument fir zwéin
Nom Doud vum Edmond de la Fontaine hu Frënn Sue gesammelt fir him e Monument opzeriichten. Kuerz drop koum et zu engem Comité, deen dem Lentz och wollt en Denkmal setzen. Op Drock vum Staatsminister Eyschen, dee sech nach un dem "Dicks" säi D'Fulleparlamènt am Gréngewald erënnert huet, an deem deen dem Eyschen säin däitschfrëndleche Papp, als "ale Kueb" presentéiert hat, koum et dann zu engem Kompromëss, an de Staatsminister huet net bräichten e Monument anzeweien, wat just fir den "Dicks" eleng gewiescht wär.
[Änneren] Säi Wierk
De Michel Lentz war e gliddeche Patriot, wat aus alle senger Gedichter däitlech ervirgeet.
